10:16, 25 Qańtar 2021 | GMT +5
Petropavlda aıaldamalarǵa beınebaqylaý kamerasy ornatyldy
PETROPAVL. QazAqparat – Petropavlda buzaqylyqpen kúresý úshin ár avtoturaq, aıaldamalardyń janyna beınebaqylaý kamerasy ornatyldy, dep habarlaıdy QazAqparat tilshisi.

Petropavl qalalyq ákimdigi baspasóz qyzmetiniń málimetinshe, oblys ortalyǵynda qosymsha jańa 120 beınekamera paıda boldy. Bul – qalalyq ákimdiktiń bastamasy.
«Beınekameralardy ornatýdaǵy basty sebep – buzaqylyqtyń aldyn alý. Osylaısha jerge qoqys tastaǵandardy, aıaldama pavılonyn syndyrǵandardy anyqtaımyz. Beınebaqylaý kameralary IKOMEK -109 jedel áreket etý ortalyǵymen baılanystyrylǵan», - deıdi baspasóz hatshysy Rýfııa Mustafına.
Ótken aptada oblys ortalyǵynyń Novopavlovka kentinde úsh jigit áınekten jasalǵan aıaldamany qıratqan. Bul aıaldama pavılondarynyń árqaısy 400 myń teńge shamasynda turady. Buzaqylar beınekameralardyń kómegimen anyqtaldy.