Petropavlda aıaldamadaǵy adamdardy soqqan jeńil kólik júrgizýshisi rýlge ıe bola almaı qalǵan - polıtsııa
Buǵan deıin Petropavlda jeńil kóliktiń adamdar turǵan aıaldamany soǵyp, bes adamnyń zardap shekkenin aıtqan edik. Osy oqıǵaǵa qatysty qalalyq polıtsııa basqarmasy túsinik berdi.
«26 mamyr saǵat 13.30 mınýt shamasynda Petropavldyń 45 jastaǵy turǵyny Jambyl kóshesinde «Honda Fit» markaly kólik quralyn basqaryp kele jatyp jolaýshylar tasymaldaıtyn «Lifan» marshrýttyq avtobýsymen soqtyǵysqan.
Jol-kólik oqıǵasy nátıjesinde «Honda Fit» avtokóliginiń júrgizýshisi kólik tizginine ıe bola almaı, ishinde avtobýsty kútken adamdar turǵan Jambyl kóshesindegi aıaldama pavılonyna baryp soǵylǵan.
Jedel járdem brıgadalarynyń qyzmetkerleri túrli medıtsınalyq mekemelerge zardap shekken úsh adamdy jetkizdi.
Tekserý nátıjeleri boıynsha zardap shekken áıelderdiń biri oblystyq aýrýhanaǵa jatqyzyldy.
Júrgizýshilerge medıtsınalyq tekserý júrgizildi, aldyn-ala málimetter boıynsha, eki júrgizýshi de mas emes», - delingen habarlamada.
Polıtseılerdiń aıtýynsha, kólik quraldary arnaıy aıyp turaǵyna qoıyldy.
Atalǵan fakti QR Qylmystyq kodeksiniń 345-babynyń 2-bóligi boıynsha Sotqa deıingi tergep-tekserýlerdiń biryńǵaı tiziliminde tirkeldi. Saraptamalar taǵaıyndaldy, anyqtaý júrgizilip jatyr.
Aıta keteıik, buǵan deıin jeńil kóliktiń adamdar turǵan aıaldamaǵa soǵylǵanyn habarlaǵan edik.