Petropavlda avtovokzal 400 mln teńgege satylyp jatyr
PETROPAVL. QazAqparat – Petropavlda 9 aı boıy jumys istemegen avtovokzal byltyr 9 mln teńge shyǵynǵa batty. Nysan ıesi ǵımaratty satylymǵa shyǵardy, dep habarlaıdy QazAqparat tilshisi.
Avtovokzaldyń máselesi Soltústik Qazaqstan oblystyq kásipkerler palatasynda qaraldy. Kásipker Aleksandra Sysoevanyń aıtýynsha, byltyr 5 shildeden bastap avtovokzaldar men tasymaldaýshylardyń jumysyna shekteý qoıyldy. Sodan beri halyqaralyq, oblysaralyq jolaýshylar tasymaly bolmaǵan, kásiporyn qıyn-qystaý kezeńdi ótkerip jatyr.
«Jumys istemegenimizge 9 aı boldy. Biraq jolaýshylardy zańsyz túrde Qostanaıǵa da, Kókshetaýǵa da, Shortandyǵa da tasymaldap jatyr. Jekemenshikter kúnde bizdiń vokzal alańynan adamdardy jınap alyp ketedi. Olar jeńil kólikpen emes, ashyq túrde shaǵyn avtobýstarmen jumys istep jatyr. Al bizge áli kúnge deıin jumys isteýge bolmaıdy. Bizdiń resmı tasymaldaýshylarymyz 6 aıdan beri osy qalalarǵa shyǵa almaı otyr. Saldarynan biz de zardap shegip jatyrmyz. Ótken jyl boıynsha biz 9 mln teńge shyǵyn shektik», - deıdi «Petropavl avtovokzaly» JShS dırektory Aleksandra Sysoeva.
SQO kásipkerler palatasynyń sarapshysy Olga Dostlerdiń aıtýynsha, QR bas memlekettik sanıtar dárigeriniń 25 jeltoqsan 2020 jylǵy № 68 qaýlysy №4 qosymshasyna sáıkes qalaaralyq, oblysaralyq turaqty avtobýstar men shaǵyn avtobýstar óńir «jasyl» jáne «sary aımaqta» bolsa 300 shaqyrymǵa deıin júre alady.
«25 jeltoqsan 2020 jyldan bastap 9 qańtar 2021 jylǵa deıin SQO da, Aqmola oblysy da koronavırýstyń taralýy boıynsha «sary aımaqta» boldy. Alaıda Petropavl avtovokzaly bul múmkindikti paıdalanbady. Sondaı-aq 2020 jyldyń tamyzynda kásiporyn «InfoQazaqstan» elektrondy platformasy arqyly sanıtarlyq talaptarǵa saı keletinin rastap, jumysyn jalǵastyrýǵa ruqsat aldy. Osylaısha jumysty jandandyrýǵa respýblıkalyq deńgeıde ruqsaty bolsa da, belgisiz sebeptermen iske kirispedi.SQO bas sanıtar dárigeriniń № 40 qaýlysy avtovokzal, avtostansalardyń jumysyna, qalaralyq, oblysaralyq tasymalmen aınalysýǵa ruqsat beredi, tek qatań shekteý sharalary engizilgen eldimekenderdi eseptemegende», - deıdi Olga Dostler.
Avtovokzaldyń ókilderi ruqsat etilgen ara qashyqtyqty 500 shaqyrymǵa deıin ulǵaıtýdy surady. Olar ár 2-2,5 saǵat saıyn jolaýshylardyń maskalaryn aýystyrýǵa daıyn. Sondaı-aq avtokólikti sanıtarlyq óńdeý talaptaryn da qaıta qarap, táýligine ekeýge deıin qysqartý qajet. Mundaı ózgerister Qostanaı oblysyna ǵana emes, Nur-Sultan qalasyna da reısti jiberýge múmkindik bermek. Másele koronavırýs ınfektsııasynyń taralýyna jol bermeý jónindegi vedomstvoaralyq komıssııanyń otyrysyna shyǵarylatyn boldy.
Al avtovokzal ıeleri jaǵdaıdyń túzelýin kútpeı nysandy saýdaǵa shyǵardy. OLX saıtynda shyqqan habarlandyrýda Petropavl avtovokzaly 400 mln teńgege satylyp jatyr.
Buǵan deıin pandemııaǵa baılanysty Petropavl 1,4 mlrd teńge kiristen aıyrylǵanyn aıtqan edik.
