Petropavlda avtokólikti aıdap áketken adam ustaldy
PETROPAVL. QazAqparat - «Quqyqtyq tártip» respýblıkalyq jedel-profılaktıkalyq is-sharasy aıasynda petropavldyq polıtseıler avtomobıl aıdap áketken kúdiktini ustady, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylary kúdik týdyrǵan Volkswagen Passat markaly avtomashınany toqtatqan. Avtokólikke zaqym keltirilgenin kórgen polıtseıler júrgizýshiniń qujattaryn tekserip, onyń spırttik ishimdik ishkenin baıqaǵan.
Jambyl aýdanynyń ortalyǵy Presnovka aýylynyń 27 jastaǵy turǵyny avtomashınanyń oǵan tıesili emes ekendigin moıyndady. Ol - Lesnaıa kóshesi boıyndaǵy úıdiń aýlasynan birneshe saǵat buryn ruqsatsyz minip ketipti. Er adamnyń sózine qaraǵanda, ol túnde 4 ret kólik urlyǵyn jasamaq bolǵan. Avtokóliktiń júk salǵyshynan pyshaq jáne balǵa tabyldy.
Medıtsınalyq tekserýden ótken mas júrgizýshi qalalyq PB Ekinshi polıtsııa bóliminiń jedel-tergeý tobyna tabys etildi. «Avtomobıldi nemese ózge de kólik quralyn jymqyrý maqsatynsyz quqyqqa syıymsyz ıelenip alý» deregi boıynsha sotqa deıingi tergep-tekserýdiń biryńǵaı tizilimine engizildi.
Tártip saqshylarynyń aıtynsha, «Quqyqtyq tártip» respýblıkalyq operatsııasynyń eki kúninde 1343 ákimshilik quqyq buzýshylyq anyqtalǵan. Onyń 207-si alkogoldik ishimdikter ishý nemese qoǵamdyq oryndarǵa masań kúıde kelý, 20-sy avtokólikti mas kúıde basqarý boıynsha.
Jedel-profılaktıkalyq is-shara 20-shy naýryzda aıaqtalady.
