Petropavlda avtokólik shuńqyrǵa túsip ketti
PETROPAVL. QazAqparat – Petropavlda jeńil avtokólik abaısyzda kommýnaldyq qyzmettiń qazǵan oryna qulap ketti, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, oqys oqıǵa 3 qarashaǵa qaraǵan túni Petropavlda M.Jumabaev pen S.Muqanov kósheleriniń qıylysynda bolǵan.
«VAZ 2112» avtokóligin mingen júrgizýshi qarańǵyda kommýnaldyq qyzmettiń qazǵan oryn baıqamaı, abaısyzda qulap ketken.
Bul jaıynda kólik júrgizýshisi polıtsııaǵa habar bermegen, kóligin tastap oqıǵa ornynan ketip qalǵan. Petropavl qalalyq Polıtsııa basqarmasy jol polıtsııasy batalonynyń qyzmetkerleri júrgizýshini anyqtady.
Ol oblys ortalyǵynyń 30 jastaǵy turǵyny bolyp shyqty.
Qazirgi ýaqytta jol-kólik oqıǵasy boıynsha ákimshilik is qozǵaý úshin materıal jınalyp jatyr.
