Petropavlda avtokólik baǵdarshamǵa soǵylyp, artynan otqa orandy
PETROPAVL. QazAqparat – Petropavlda kólikti mas kúıde basqarǵan júrgizýshi baǵdarshamǵa soǵylyp, mashınasy otqa orandy, dep habarlaıdy QazAqparat tilshisi.
Soltústik Qazaqstan oblysy Polıtsııa departamenti baspasóz qyzmetiniń málimetinshe, jol-kólik oqıǵasy 1 qazan, keshki saǵat 22.20 mınýt shamasynda bolǵan. Músirepov jáne Sh.Ýálıhanov kósheleriniń qıylysynda «Audi S4» kóliginiń 30 jastaǵy júrgizýshisi búıirlik ıntervaldy saqtamaı, qarsy bette kele jatqan «Daewoo» kóligimen soqtyǵysqan. Odan «Audi S4» qozǵalysyn jalǵastyryp, baǵdarshamǵa baryp soǵylady. Kóliktiń júrgizýshisi oqıǵa ornynan qashyp ketedi. Al soqqy saldarynan mashınanyń qozǵaltqyshynan órt shyǵyp, ony oqıǵa ornyna jetken órt sóndirýshiler sóndirip aldy. Kólik aıyp turaǵyna qoıyldy.
Tártip saqshylary qashyp ketken júrgizýshini jaqyn mańdaǵy aýlalardyń birinen ustady. Medıtsınalyq saraptama onyń mas ekenin kórsetti.
«Audi S4» júrgizýshisi jol-kólik oqıǵasynda túrli dene jaraqatyn aldy. Polıtseıler ony sol mańdaǵy emdeý mekemesine jetkizdi, qazir ambýlatorlyq em alyp jatyr.
«Daewoo» kóliginiń júrgizýshisi zardap shekken joq. Ákimshilik quqyqbuzýshylyq boıynsha materıal jınalyp, protsessýaldy sheshim qabyldaý úshin Petropavl qalasynyń polıtsııa basqarmasynyń ákimshilik polıtsııa bólimine jiberildi.
