Petropavlda avtobýstar men aıaldamalar jańartylady
PETROPAVL. QazAqparat - Petropavl qalasynyń qoǵamdyq keńesinde qalaishilik baǵyttaǵy avtobýstar men aıaldamalardyń máselesi kóterildi. Bıyl olardyń birqatary jańartylady, dep habarlaıdy QazAqparat tilshisi.
Petropavl qalasynda qazirgi ýaqytta 330 qoǵamdyq kólik jolaýshy tasymalymen aınalysady. Avtobýstar 24 baǵyt boıynsha júredi. Alaıda kólikterdiń kópshiligi eskirgen. 330 tehnıkanyń 150-iniń qoldanysy jeti jyldan asyp ketken. Mamandardyń aıtýynsha, oblys ortalyǵyndaǵy qoǵamdyq kólikterdiń 75-i 3 jyl ishinde jańalanbaq.
«Bıyl qoǵamdyq kóliktiń 18-i jańartylady dep josparlanǵan. Keler jyly 28-i, al 2021 jyly qosymsha taǵy 29-y jańasyna aýystyrylady. Bul - barlyq kóliktiń 23 paıyzy», - deıdi Petropavl qalalyq turǵyn-úı kommýnaldyq sharýashylyǵy, jolaýshylar kóligi jáne avtomobıl joldary bólimi basshysynyń mindetin atqarýshy Dosylan Bosynov.
Budan basqa, aıaldama pavılondaryn jańartý da josparlanǵan. Kommýnaldyq mekeme mamandarynyń aıtýynsha, oblys ortalyǵynda 362 aıaldama bar. Árqaısysynyń quny - orta eseppen 1 mln teńge shamasynda. Bıyl Petropavlda jospar boıynsha taǵy 70 jańa aıaldama paıda bolmaq.
