Petropavlda avtobýsta 12 jasar qyzdy urǵan er adam ustaldy
PETROPAVL. KAZINFORM — Petropavl turǵynyna qatysty qylmystyq is qozǵaldy.
Áleýmettik jelide taraǵan beınejazbadan er adamnyń jasóspirim qyzdyń basynan urǵanyn kórýge bolady.
Kýágerlerdiń aıtýynsha, oqıǵa Petropavldaǵy № 2 avtobýsta bolǵan. Eki er adam shamamen 12 jastaǵy eki qyzǵa tıisip, beıádep sózder aıtqan, olarǵa jasóspirimderdiń syrtqy kelbeti unamaǵan. Jolaýshy boıjetken ara túskenimen, janjal ýshyǵa túsken.
— Qyz qatty qorqyp, jylady. Al avtobýstyń kondýktory oqıǵaǵa múldem aralasqan joq. Birden polıtsııa men jedel járdem qyzmetkerlerin shaqyrdyq, - deıdi avtobýsta bolǵan jolaýshy.
Tártip saqshylary kúdiktilerdi izin sýytpaı anyqtap, qyzǵa qol júmsaǵan er adamdy qamaýǵa aldy.
— Qala ishindegi avtobýsta kámeletke tolmaǵan qyzǵa qatysty quqyqqa qaıshy áreketter faktisi boıynsha polıtsııa dereý sharalar qabyldady. Kúdikti birden ustalyp, polıtsııa bólimshesine jetkizildi. Atalǵan fakti boıynsha qylmystyq is qozǵaldy. Sotqa deıingi tergeý amaldary júrgizilip jatyr. Balalarǵa qatysty mundaı áreketter zańdy óreskel buzý retinde baǵalanady jáne qatań jazalanady. Bul jaǵdaı tolyq polıtsııa baqylaýynda, — dep jaýap berdi Soltústik Qazaqstan oblystyq polıtsııa departamenti baspasóz qyzmetindegiler.
Buǵan deıin Almatyda sarbaz áskerı bólim ǵımaratynyń úshinshi qabatynan sekirip ketkenin jazǵan edik.