Petropavlda avtobýs baǵdarshamda eki adamdy qaǵyp ketti
PETROPAVL. QazAqparat – Petropavlda baǵdarshamnyń jasyl túsiniń janýyn kútpeı, joldy kesip ótpek bolǵan eki adamdy avtobýs qaǵyp ketti, dep habarlaıdy QazAqparat tilshisi.
WhatsApp messendjerinde Petropavldaǵy Býketov-Pýshkın kósheleriniń qıylysynda bolǵan jol-kólik apatynyń beınejazbasy tarady. Eki adam baǵdarshamnyń jasyl túsi janýyn kútpeı joldy kesip ótpek bolǵan. Saldarynan olardy qatty jyldamdyqpen kelip qalǵan avtobýs soqty. Oqys oqıǵa kóshedegi beınekameraǵa túsip qalǵan. Jazbadan jol-kólik oqıǵasynyń 3 jeltoqsan kúni keshki saǵat 19.56-da bolǵanyn kórýge bolady.
SQO densaýlyq saqtaý basqarmasy baspasóz qyzmetiniń málimetinshe, jol-kólik oqıǵasynda eki adam zardap shekti.
«2007 jyly týǵan qyz bala oblystyq balalar aýrýhanasyna jetkizildi. Onyń jaraqaty jeńil boldy, sondyqtan tıisti medıtsınalyq kómek kórsetilgennen keıin úıine jiberildi. Qyzdyń qasynda bolǵan 30-dar shamasyndaǵy jigit oblystyq kópbeıindi aýrýhananyń neırohırýrgııa bólimshesine jatqyzyldy. Er adamnyń úsh qabyrǵasy synǵan, jabyq bas súıek-mıy zaqymdanǵan», - deıdi oblystyq densaýlyq saqtaý basqarmasy baspasóz qyzmetiniń hatshysy Gúlnar Qalıeva.
