Petropavlda «Auyl Fest. Qaz sharýashylyǵy» I halyqaralyq túrki etnomádenı festıvali ótti
PETROPAVL. KAZINFORM – Petropavlda qaz ósirý sharýashylyǵyn nasıhattaǵan alǵashqy halyqaralyq etnomádenı festıval ótti.
«Auyl Fest. Qaz sharýashylyǵy» festıvali Petropavldaǵy N.Pogodın atyndaǵy drama teatrynyń aldynda ashylyp, bul jerde aýyl sharýashylyǵy tehnıkasynyń kórmesi, oblystyń taýar óndirýshileriniń jármeńkesi ótti. Sondaı-aq Tatarstannan kelgen qonaqtar ulttyq taǵamdardyń kórmesin uıymdastyrdy.
Festıvalge kelgender Majarstan, Tatarstan, Bashqurtstannan jáne Petropavl men Almaty qalalary aspazdarynyń ónerin tamashalap, qaz etinen jasalǵan taǵamdardyń dámin tatty. Veterınarlyq preparattar, premıkster jáne qus mamyǵynan jasalǵan buıymdardyń kórmesi de ótti.
Al, Qazaqstanda qus sharýashylyǵyn damytýǵa qatysty uıymdastyrylǵan forýmge 600-ge jýyq adam jınalyp, mamandardyń pikirin bildi, keńes aldy, tájirıbe jınady.
– El tarıhynda bolmaǵan festıval búgin Petropavlda ótip jatyr. Nelikten qaz sharýashylyǵy degen zańdy suraq týyndaıdy? Bul oblysta ǵana emes, jalpy Qazaqstannyń soltústiginde – Aqmola, Qostanaı, Pavlodar óńirlerinde aýyl halqynyń kóshi-qony joǵary. Prezıdenttiń tapsyrmasymen halyqty jumyspen qamtý arqyly eldi mekenderde ustap qalý kerek. Ol úshin ne kerek, árıne, jaǵdaı jasalyp, joǵary tabysy bolýy qajet, sol kezde ol eshqaıda ketpeıdi. Sondyqtan biz bıznestiń qaı túri ózekti bolatynyn saraptap, qaz sharýashylyǵyna toqtadyq.
Qaz tez jetiledi, ıaǵnı nátıjege jarty jyldan keıin qol jetkizýge bolady. Jaz boıy ósip-jetiledi. Kúzde, qar túsisimen soıyp, jeltoqsanda saýdaǵa shyǵarady. Qaz sharýashylyǵynyń tıimdiligine kózimiz jetti, - deıdi «Aýyl» partııasy tóraǵasynyń orynbasary Qaırat Aıtýǵan.
Byltyr Aqmola oblysy Aqqól aýdanynda tájirıbe retinde joba qolǵa alynǵan. Qaz ósirýge 20 adam ótinish etse, sonyń ishinen beseýiniń árqaısysyna 160-tan tegin qaz balapany berilgen.
– Aýyl turǵyndary nesıe ala almaıdy. Óıtkeni onyń kepilge qoıatyn dúnıesi joq nemese áli jabylmaǵan nesıesi bar. Sondyqtan biz ınvestor taptyq, ol sharýaǵa qaz balapanyn, jemin jáne qajetti medpreparattaryn alyp berip, kelisimge otyrady. Kúzde aýyl turǵyny 4,5 aıdan keıin ol bizge 25% nemese 156 kg qaz etin, ıaǵnı 40 qazdy qaıtarady. Qalǵanyn ózine alyp qalady. Byltyr osy jobaǵa qatysýshylar 4,5 aıdyń ishinde orta eseppen 1-1,2 mln teńge aqsha tapty. Bıyl taǵy qatysýǵa nıet etip otyr jáne 500-1000 balapan alyp ósirýdi josparlaǵan. Qaz sharýashylyǵynyń bolashaǵy zor jáne ony elimizdiń soltústiginde damytý kerek. Munda qaz ósirýge qolaıly jaǵdaıbar, nátıjesinde qaz eti de, maıy da paıdaly, - deıdi Qaırat Aıtýǵan.
Al Petropavldyń ortalyq alańynda etno-folklorlyq ansamblderdiń qatysýymen kontsert ótti, sporttyq oıyndar oınatyldy.
Sonyń ishinde eń qyzyǵy alǵash ret uıymdastyrylǵan qazdardyń jarysy boldy.
20 qaz arnaıy jasalǵan jolǵa jiberilip, jarys bastalyp ketti.
– Jarys olımpıadalyq júıemen ótedi. Kim birinshi keledi, sol jeńimpaz. Qazdyń ıelerine olardy aqyryn qýyp otyrýǵa bolady. Al jeńimpazdarǵa aqshalaı syılyq bar, - deıdi jarysqa qazylyq etken Maqsat Artyq.
Festıvalge, sonyń ishinde qaz jarysyn tamashalaýǵa kelgen halyqtyń qarasy qalyń boldy.
Buǵan deıin SQO-da jyl basynan beri 35 adam Qazaqstan azamattyǵyn alǵanyn jazǵan edik.