Petropavlda aýlalardan zańsyz qoıylǵan shlagbaýmdar men beton bógetter alynyp jatyr
PETROPAVL. KAZINFORM – «Erkin jol júrý» respýblıkalyq aktsııasy aıasynda Petropavl aýlalary arnaıy qyzmetterdiń jolyn bógeıtin zattardan tazartylyp jatyr.
Soltústik Qazaqstan oblysy tótenshe jaǵdaılar departamentiniń málimetinshe, aktsııanyń basty maqsaty - órtke qarsy qyzmet bólimsheleriniń tótenshe jaǵdaılarǵa jedel áreket etýin, órt sóndirý men qutqarý tehnıkasynyń oqıǵa ornyna kedergisiz jetýin qamtamasyz etý.
Іs-shara aıasynda aýlalarǵa kireberis joldardyń jaı-kúıi tekserilip, polıtsııa qyzmetkerleri men MIB tóraǵalarynyń qatysýymen profılaktıkalyq reıdter uıymdastyrylyp jatyr.
Sonymen qatar turǵyndar arasynda túsindirý jumystary da júrgiziledi. Arnaıy tehnıkanyń erkin qozǵalýyna kedergi keltiretin zattar joldan alynady.
- Tótenshe jaǵdaı týraly shaqyrtý túsken sátten bastap ár mınýt asa mańyzdy. Sondyqtan qutqarý tehnıkasy oqıǵa ornyna neǵurlym tez jetse, kómekke muqtaj jandarǵa da soǵurlym jedel kómek kórsetiledi, – deıdi SQO TJD resmı ókili Marına Samoılenko.
Buǵan deıin Kókshetaýda shaqyrtýǵa shyqqan órt sóndirý kóligi apatqa ushyraǵanyn jazǵan edik.
Sondaı-aq Pavlodarda órtenip jatqan úıdiń terezesinen sekirgen qyz kóz jumǵanyn habarladyq.
