Petropavlda aýlaǵa kiretin joldar jabyq tursa, PIK tóraǵalary aıyppul tóleıdi
PETROPAVL. QazAqparat - Turǵyn úılerge kireberis joldardyń bolmaýy órt qaýipsizdigi erejelerin buzýshylyq bolyp sanalady, dep habarlaıdy «QazAqparat» HAA tilshisi SQO TJ departamentiniń baspasóz qyzmetine silteme jasap.
Jańa tas joldar men balalarǵa arnalǵan aýlalar paıda bolǵaly beri qala turǵyndarynyń kóbi aýlalaryna kiretin joldardy jaýyp, tipti keıbireýleri óz betterimen shlagbaýmdar ornatyp alatyn bolǵan. Tótenshe jaǵdaı bolǵan jaǵdaıda mundaı aýlaǵa ne órt sóndirýshiler, ne jedel járdem kire almaıdy.
«Órt oryn alǵan jaǵdaıda, qutqarýshylardyń oqıǵa ornyna jetýi qıynǵa soǵady. Óıtkeni, olardyń qymbat ýaqyttary basqa ótý joldaryn izdeýge ketedi. Byltyrǵy jyly turǵyndardyń osyndaı óz betterimen sheshim qabyldaýy qaıǵyly oqıǵaǵa dýshar etken bolatyn. Turǵyn úılerdiń birinde órt shyǵyp, adam qazasyna ákeldi. Birneshe PIK basshylary aıyppul tóleý túrindegi ákimshilik jaýapkershilikke tartyldy. Olar qaýipsizdiktiń bárine, eń aldymen osy jerde turatyn adamdarǵa kerek ekendigin túsinýi kerek», - dedi SQO TJD órt sóndirý jáne apatty-qutqarý jumystary qyzmetiniń baspasóz hatshysy Amangeldi Áýeshanov.
Jyl basynan beri Soltústik Qazaqstan oblysynda 414 órt bolyp, 58 mln teńgeden astam materıaldyq shyǵyn keltirildi. Tilsiz jaý 13 adamnyń ómirin qıyp ketti, olardyń qatarynda 3 bala bar. Órttiń 80 paıyzy turǵyn úılerden shyǵady.
