Petropavlda Aýǵanstan men Qyrǵyzstan azamattarynan bir mln doza geroın tárkilendi

PETROPAVL. QazAqparat – Petropavlda Ulttyq qaýipsizdik komıtetiniń qyzmetkerleri Aýǵanstan jáne Qyrǵyzstannan kelgen eki sheteldikten 9 keliden astam geroın tárkiledi, dep habarlaıdy QazAqparat tilshisi.

Soltústik Qazaqstan oblystyq prokýratýrasynyń málimetinshe, arnaıy organdardyń qyzmetkerleri óńirde esirtkiniń buryn-sońdy bolmaǵan asa iri partııasyn toqtata aldy. 9 kg geroınnen orta eseppen bir rettik qoldanýǵa bolatyn shamamen 1 mln doza shyǵady. Tergeý barysynda Aýǵanstan jáne Qyrǵyzstan azamattarynyń bul esirtkini odan ári jetkizip, satpaq bolǵandyǵy, sonyń ishinde SQO turǵyndaryna da ótkizýdi maqsat tutqany anyqtaldy. Aıyptalýshylardyń kinási tolyǵymen dáleldendi. Sottyń úkimimen shetel azamattarynyń árqaısysy 11 jylǵa bas bostandyǵynan aıyrylady.

Jazasyn olar eń joǵary qaýipsizdik mekemesinde ótkeredi. Jalpy bıyl SQO-da esirtki quraldary men psıhotroptyq zattardyń zańsyz aınalymy úshin barlyǵy 60 adam sottaldy. Onyń ishinde 20 adamǵa esirtkini óndirgeni úshin 10 jyldan 13 jylǵa deıin bas bostandyǵynan aıyrý jazasy kesildi.

Osy sanattaǵy barlyq qylmystyq isterde prokýrorlar sottardy kináli adamdarǵa qatysty eń qatań jaza taǵaıyndaýǵa baǵyttady.