Petropavlda aýdarylǵan kóliktiń júrgizýshisi oqıǵa ornynan qashyp ketti
PETROPAVL. QazAqparat - Petropavldyń áleýmettik jeli qoldanýshylary búgin aýdarylǵan avtomobıldiń sýretteri men vıdeolaryn kórip, dúrlikti, dep habarlaıdy «QazAqparat» HAA tilshisi.
Kýágerler oqıǵa ornyndaǵy sýretter men vıdeolardy barlyq áleýmettik jelige taratty. Aq tústi «Aýdı» qala kósheleriniń birinde qasyndaǵy kólikterdi soǵyp, sodan soń aýdarylǵan.
SQO ІІD baspasóz qyzmeti K. Sýtıýshev kóshesindegi jol-kólik apatyn rastap, «Aýdı» markaly kólik júrgizýshisiniń qashyp ketkenin málimdedi.
«Aýdı» kóliginiń júrgizýshisi rýlge ıe bola almaı, joldyń jıegindegi turaqta turǵan avtomashınalardy soqqan. Jol-kólik apaty saldarynan mashına aýdarylyp, onyń júrgizýshisi apat ornynan jaıaý izin sýytqan. Jergilikti polıtsııa qyzmeti JKA ornynda qajetti is-sharalardy júrgizgennen keıin, mashınany aıyppul turaǵyna qoıdy», - dep habarlady baspasóz qyzmetindegiler.
SQO ІІD JPQ izdeý bóliminiń bastyǵy, polıtsııa kapıtany Madııar Harıpovtyń aıtýynsha, júrgizýshi anyqtalýda, ony ustaý sharalary júrgizilýde.
