Petropavlda aýany lastaǵan qoǵamdyq kólikterge aıyppul salyndy
PETROPAVL. QazAqparat – Petropavlda «Qaýipsiz jol» jedel-profılaktıkalyq is-sharasy aıasynda oblys polıtseıleri men ekologtar qoǵamdyq kólikterge qatysty reıd ótkizdi, dep habarlaıdy QazAqparat tilshisi.
Soltústik Qazaqstan oblysy polıtsııa departamenti baspasóz qyzmetiniń málimetinshe, polıtseıler ekologııalyq qaýipsizdikti qamtamasyz etý úshin ekologtarmen birge jolaýshylar tasymaldaıtyn kólikterdi tekserdi. Arnaıy qurylǵy qozǵaltqyshtaǵy aýany lastaıtyn zattardyń deńgeıin kórsetedi. Ókinishke oraı, nátıje kóńil qýantarlyq emes. Gaz mólsheri ólshengen 6 avtobýstyń 5-inde tútin shamadan tys shyǵarylǵan. Bir kólikte kórsetkish 5 ese, endi birinde 16 ese kóp bolǵan.
«Júrgizýshiler QR Ákimshilik quqyq buzýshylyq týraly kodeksiniń 334-baby «Shyǵaryndylarda lastaýshy zattardyń bolýy normatıvterden asyp ketetin avtomotokólikterdi jáne basqa da jyljymaly quraldardy paıdalaný» boıynsha jaýapkershilikke tartyldy. Aýany lastaıtyn zattardyń kólemi 2 ese kóp bolsa, eskertý, al odan kóp bolsa 2 AEK mólsherinde aıyppul salynady. Quqyq buzýshylar aıyppuldaryn 7 táýlikte óteıtin bolsa, teń jartysyn, ıaǵnı 1 AEK tóleıdi. Sondaı-aq, joldardaǵy qaýipsizdikti arttyrý úshin kólik quraldarynyń tehnıkalyq jaǵdaıy tekseriledi. «Qaýipsiz jol» jedel-profılaktıkalyq is-sharasynyń úsh aptasy ishinde tehnıkalyq baıqaýdan ótpegen 350-ge tarta avtokólik anyqtaldy. Reıs aldyndaǵy baıqaýdan tórt avtobýs júrgizýshisi ótpegen», - deıdi SQO PD Jergilikti polıtsııa qyzmeti basqarmasy bastyǵynyń mindetin atqarýshy Grıgorıı Tysh.
Іs-shara bastalǵaly oblys joldarynda jol qozǵalysyna qatysýshylarǵa qaýip tóndirýdiń 9 myńnan astam deregi anyqtaldy.
