Petropavlda aýada kúkirtsýtek mólsheri normadan 23 ese asyp ketti
PETROPAVL. KAZINFORM — Petropavl turǵyndary buǵan deıin birneshe ret ýáde etilgenimen qolqany qabatyn jaman ıisten qutyla almaı otyr.
Kóktem shyǵyp, kún jylynysymen Petropavlda keı kúnderi dalaǵa shyǵyp, demalyp bolmaıdy. Aýaǵa taraǵan kúkirtsýtekten ásirese allergııasy, tynys alý múshelerinde kináraty barlar zardap shegedi.
Soltústik Qazaqstan oblysy boıynsha ekologııa departamenti osy máselege qatysty suraýymyzǵa jaýap berdi.
— Oblys ortalyǵynda kúkirtsýtektiń negizgi kózi — «Qyzyljar sý» JShS balansynda turǵan jáne Petropavl káriz-tazartý qurylystarynyń quramyna kiretin «Bıoprýd» sarqyndy sýdy jınaqtaýshy toǵan. Kóktemde toǵannyń muzy erip, beti ashylǵanda, túbindegi shógindilerdiń tabıǵı ydyraý protsesinde býlanýǵa baılanysty kúkirtsýtektiń aýaǵa taralýy artady. Al jel baǵyty ózgergen jaǵdaıda onyń ıisi qalaǵa keledi, — deıdi departament basshysy Talǵat Sábıev.
«Qazgıdromet» RMK SQO fılıalynyń qorshaǵan ortanyń jaı-kúıi týraly aqparattyq bıýlleteni derekterin negizge alǵan ekologtar osy jyldyń birinshi toqsanynda Petropavlda kúkirtsýtektiń shekti ruqsat etilgen kontsentratsııadan 634 ret asyp ketý deregin tirkegen.
Al sáýir aıynda qala aýmaǵynda kúkirtsýtek boıynsha atmosferalyq aýanyń joǵary lastanýynyń 2 jaǵdaıy anyqtalǵan.
Birinshisinde ruqsat etilgen normadan 10,4, ekinshisinde 23,7 ese asqany tirkeldi.
— Densaýlyq saqtaý mınıstriniń buıryǵymen bekitilgen qalalyq jáne aýyldyq eldi mekenderdegi, ónerkásiptik uıymdardyń aýmaqtaryndaǵy atmosferalyq aýaǵa arnalǵan gıgıenalyq normatıvterge sáıkes aýadaǵy kúkirtti sýtektiń shekti ruqsat etilgen kontsentratsııasy 0,008 mg/m3 aspaýy tıis. Atmosferanyń kúkirtsýtegimen lastanýyna turaqty monıtorıng jasaý úshin departament aı saıyn jáne qolaısyz meteorologııalyq jaǵdaıdy boljaý kúnderi «Qyzyljar sý» JShS káriz-tazartý qurylysynyń sanıtarlyq-qorǵaý aımaǵynyń shekarasynda, sondaı-aq kúkirtsýtektiń naqty kontsentratsııasyn belgileý maqsatynda «Bıoprýd» sarqyndy sý jınaqtaǵyshynyń janynda atmosferalyq aýany aspappen ólsheıdi, — deıdi Talǵat Sábıev.
Sonymen qatar, departamenttiń bastamasy boıynsha atmosferalyq aýanyń kúkirtti sýtegimen lastaný problemasy SQO-nyń 2020-2025 jyldarǵa arnalǵan ekologııalyq problemalaryn keshendi sheshý jónindegi Jol kartasyna endi.
Ol boıynsha Petropavl qalasynda káriz tazartý qurylystarynyń qoldanystaǵy tehnologııalyq shemasyn jańǵyrtýdy aıaqtaý josparlanǵan.
— Aǵyndy sýǵa tıisti bıologııalyq tazartýdy engizgennen keıin, sondaı-aq «Bıoprýd» toǵan-jınaǵyshy túbin shógindilerden tazartqannan keıin qala aýmaǵyna kúkirtsýtek ıisiniń taralý qaýpi aıtarlyqtaı azaıady, — deıdi departament basshysy.
2021 jyly Petropavlda jaǵymsyz ıispen kúresý úshin bıotoǵanǵa 4 myń tonna baldyr salyndy. Joba úsh jylǵa shaqtalyp, nátıjesinde oblys ortalyǵy hlorella baldyrlarynyń kómegimen kúkirtsýtek ıisinen qutylýy tıis bolatyn.
«Qyzyljar Sý» JShS bul maqsatqa arnaıy qarjy da bóldi. Alaıda, nátıje áli joq.
— 2021 jyldan bastap «Qyzyljar sý» JShS «Sýdyń ǵylymı-tehnologııalyq ortalyǵy» JShS-men birlesip, «Bıoprýd» jınaqtaǵyshynan bólinetin kúkirtsýtek kontsentratsııasyn tómendetý úshin hlorellany qoldana otyryp, bıologııalyq tazartý tehnologııasyn engizdi. Hlorellany qajetti kontsentratsııada ósirý jáne toǵanǵa quıý turaqty negizde júrgiziledi. Bul baldyr zııandy zattardy sińiredi, óńdep, ottegin bóledi. Hlorella kúkirtti sýtegi men kómirqyshqyl gazynyń bólinýimen anaerobty protsesterdiń aǵynyn «bloktaıdy». Kásiporynnyń ekology toqsan saıyn «Ulttyq saraptama ortalyǵy» ShJQ RMK SQO boıynsha fılıalymen birge «Bıoprýd» aýasyna 4 orynda kúkirtsýtek kontsentratsııasyn ólshep, monıtorıng júrgizedi. Asyp ketý jaǵdaılary anyqtalǵan joq, — dep jaýap berdi kásiporynnyń baspasóz qyzmeti.
Esterińizge salaıyq, buǵan deıin Qazaqstandaǵy eń las qalalar jaıynda aıtqan edik.