Petropavlda atysqandardy 20 jyl bas bostandyǵynan aıyrý jazasy kútip tur
PETROPAVL. QazAqparat - Soltústikqazaqstandyq polıtsııa qyzmetkerleri Petropavldaǵy atysqa qatysty kúdiktilerge izdeý jarııalady, dep habarlaıdy «QazAqparat» HAA tilshisi.
Petropavl qalasynyń týmasy ári turǵyny 30.04.1996 jyly týǵan Temirlan Bektasqa, RF Omby oblysynyń týmasy, SQO Qyzyljar aýdany Beskól aýylynyń turǵyny 07.05.1997 jyly týǵan Qaırat Aýshahmanovqa QR QK 293 bap 3 tarmaǵynda (buzaqylyq) qarastyrylǵan asa aýyr qylmysqa kúdikti retinde izdeý jarııalandy.
Bul azamattar 28-inen 29-ynshy shildege qaraǵan túni «Park sıtı» túngi klýbynyń aldynda bolǵan oqıǵaǵa kúdikti dep boljanyp otyr. Baqylaý kamerasyna jas jigitter arasynda janjal týyndap, olardyń biri zaqymdaýshy qarý qoldanǵany túsip qalǵan.
SQO ІІD tergeý basqarmasynyń basshysy Qaırat Qasymbekovtyń aıtýynsha, osy ýaqytqa deıin ne medıtsına mekemelerine, ne polıtsııa qyzmetine shaǵym aıtyp eshkim kelmegen.
Túngi klýbtyń ákimshiligi de ákimshilik jaýapkershilikke tartylady. Byltyrǵy jyly osy oıyn-saýyq mekemesiniń aldynda tóbeles bolyp, basketbolshy Igor Nanaev qaza tapqan edi.
Aıta keteıik, ótken demalys kúnderi Petropavlda jastardyń qarý qoldanýymen eki birdeı janjal boldy. Ekinshi oqıǵa barysynda 19 jasar petropavldyq azamatqa oq tıip, aıaǵynan aıyryldy.
Kúdiktilerden alynǵan qarý saraptamaǵa jiberildi. Polıtsııa qyzmetkerleri qarýdyń jastardyń qolyna qaıdan túskenin anyqtaýda.
Janjalǵa qatysýshylar 16-dan 19 jasqa deıingi kolledj stýdentteri jáne jumyssyz jastar. Olardy QR QK qarastyrylǵan «Adam ómirine qastandyq jasaý» boıynsha 15-ten 20 jylǵa deıin bas bostandyǵynan aıyrý jazasy kútip tur.
