Petropavlda attraktsıonnyń tejegishi isten shyǵyp, 5 bala zardap shekti
Oqys oqıǵa keshe Petropavlda 1 maýsym – Halyqaralyq balalardy qorǵaý kúni bolǵan. Ortalyq saıabaqtaǵy «gýsenıtsa» dep atalatyn átkenshek isten shyǵyp, bes balaǵa alǵashqy medıtsınalyq kómek qajet boldy.
Attraktsıondar «Mır attraktsıonov» JShS-ge qarasty. Oqıǵadan keıin onyń basshylyǵy qalyptasqan jaǵdaıǵa túsinik berdi.
«Keshe attraktsıonǵa kelgenderdiń qarasy qalyń boldy, úlken júkteme artyldy. «Gýsenıtsa» átkensheginiń isten shyǵýyna joǵary aýa temperatýrasy da áser etken bolýy kerek. Saldarynan tejegishi isten shyǵyp, birneshe kabına kilt toqtaǵan. Balalardyń deneleri soǵylǵan. Olarǵa birden medıtsınalyq kómek kórsetilip, úılerine jiberildi. Qazir «gýsenıtsa» átkenshegi toqtap tur, bolǵan oqıǵanyń mán-jaıy anyqtalyp jatyr. Astana qalasynan sarapshy kelip, naqty sebebin anyqtaıdy», - delingen «Mır attraktsıonov» JShS taratqan aqparatta.
Oıyn-saýyq ortalyǵy mamandarynyń aıtýynsha, saıabaqtaǵy barlyq atrraktsıondar jylda paıdalanýǵa berilmes buryn kóktemde táýelsiz zerthananyń tekserisinen ótedi.
Al zardap shekken balalar 3 pen 12 jas aralyǵynda.
«Oblystyq balalar aýrýhanasyna bes bala qaraldy, olardyń ekeýi jedel járdem kóligimen jetkizildi. Úsheýin týystary ákeldi. Barlyǵyn ambýlatorlyq em alýǵa jiberdik», - dedi emdeý mekemesiniń mamandary.
