Petropavlda ata-analar apattyq mekteptiń jabylýyna qarsy

PETROPAVL. QazAqparat – Petropavlda №19 bastaýysh mektep apatty dep tanylyp, jabyldy. Ata-analar bul sheshimge qarsy, dep habarlaıdy QazAqparat tilshisi.

№19 bastaýysh mektep Petropavldaǵy Kırpıchnyı shaǵyn aýdanynda ornalasqan. 1959 jyly salynǵan nysannyń qabyrǵasy sógile bastaǵan. Lıtsenzııasy bar kompanııa ǵımaratty tekserip, ony apatty jaǵdaıda tur dep qorytyndy shyǵardy.

Soltústik Qazaqstan oblystyq bilim basqarmasynyń málimetinshe, zaqymdalǵan jerlerdi jóndeý múmkin emes, kez-kelgen ýaqytta tóbesi qulap ketýi múmkin.

Alaıda, ata-analar mekteptiń jabylýyna qarsy, olardyń aıtýynsha, qazirgi ýaqytta mekteptiń jabylǵandyǵy jóninde naqty qujat joq. Mektep – shaǵyn aýdandaǵy jalǵyz bilim ordasy.

«Qazir bizge telefonmen habarlasyp, qujattaryńyzdy alyp, basqa mektepke berińizder dep jatyr. Keıin oqýshy sany az dep jaýyp tastaıdy», - deıdi shaǵyn aýdan turǵyndary.

Jańa oqý jyly qarsańynda bul bilim ordasynyń 44 oqýshysy bar. Olar 1-4 synyp oqýshylary jáne daıyndyq tobynyń tárbıelenýshileri. Mektepte, meńgerýshini qosa eseptegende 6 pedagog bar jáne tehnıkalyq qyzmet kórsetetin 4 jumysshy eńbek etedi eken.

«Ata-analarǵa jaqyn mańdaǵy №4, №23 mektepke balalaryn aýystyrý usynyldy. Munda arnaıy avtobýs balalardy tegin aparyp-ákelip turady. Budan basqa tegin tamaqpen qamtylady. Usynǵan mektepterde balalarǵa jaqsy jaǵdaı bar, sport zal jumys isteıdi. Sanıtarlyq bólmeler jóndeýden ótti, ıaǵnı tolyq bilim standartyna saı.

Bul mektepter ata-analardyń kóńilinen shyqpasa, tańdaýlary boıynsha basqa mektepterge ornalastyrý máselesin sheshemiz», - deıdi SQO bilim basqarmasynyń basshysy Názir Jáshibekov.

Qazirgi ýaqytta túsindirý jumysy júrgizilip, qujat qabyldaý júrip jatyr.

«Mekteptiń ustazdary da jumyssyz qalmaıdy, olarǵa bos oryndar usynyldy. №4, №23 mektepke de jumys bar.

Mektep 1959 jyly salynǵan. Bul mektep talapqa saı kelmeıdi, ashanasy, sportzaly joq.

Bilim ordasynyń apattyq jaǵdaıda turǵandyǵy mamyr aıynda ata-analarǵa aıtylyp, eskertildi. Balalardyń qaýipsizdigi úshin osyndaı sheshim qabyldap otyrmyz.

Tipti №4 mektepke synybymen, ustazdarymen tolyq kóshirý múmkindigi bar», - deıdi Názir Jáshibekov.

Aqerke Dáýrenbekqyzy