Petropavlda astanalyq áıelden jarty keli sıntetıkalyq esirtki tárkilendi
PETROPAVL. KAZINFORM – Petropavlda sıntetıkalyq esirtki satýdy kásip etken astanalyq áıelden jarty keliden astam esirtki alyndy. Bul - oblysta tárkilengen eń iri sıntetıkalyq esirtki partııalarynyń biri.
Soltústik Qazaqstan oblysy polıtsııa departamenti baspasóz qyzmetiniń málimetinshe, ótken jyldyń jeltoqsan aıynda esirtki qylmysyna qarsy is-qımyl basqarmasynyń qyzmetkerleri sıntetıkalyq esirtki taratýǵa qatysy bar kúdikti áıeldi ustady. Tártip saqshylary Naberejnaıa kóshesinde ketip bara jatqan «Hyundai Elantra» avtokóligin toqtatqan. Kólik salonynda Astana qalasynyń eshqaıda jumys istemeıtin 43 jastaǵy turǵyny bolǵan. Ol Petropavl qalasynda ýaqytsha turyp kelgen. Áıelden 80 túıinshek tárkilendi.
Saraptama nátıjesine sáıkes, bul zat «mefedron» sıntetıkalyq esirtkisi bolyp shyqty. Onyń turǵylyqty mekenjaıynan da esirtki men býyp-túıý quraldary tabyldy. Tárkilengen zattyń jalpy salmaǵy 0,5 kg asty. Onyń 247,8 gramy – mefedron, 322,36 gramy α-PvP esirtkisi.
«Bul fakti QR Qylmystyq kodeksiniń 297-babynyń 3-bóligi boıynsha Sotqa deıingi tergep-tekserýlerdiń biryńǵaı tizilimine engizildi. Jedel ýákilderdiń aqparaty boıynsha, ınternet-dúkendegi kýratorlary kúdiktini «býyp-túıýshi» retinde Petropavlǵa jibergen. Áıel 2 aı jumys istep úlgergen. Bul - oblysta tárkilengen eń iri sıntetıkalyq esirtki partııalarynyń biri», - deıdi SQO PD esirtki qylmysyna qarsy is-qımyl basqarmasynyń bastyǵy Rýslan Saparov.
