Petropavlda áskerı mindetin atqaryp jatqan 16 sarbaz bilim grantyn aldy
Petropavlda «Áskerı mindetti 2.0» jobasy aıasynda búgin 16 sarbazǵa ózderi tańdaǵan joǵary oqý ornynda tegin oqýǵa múmkindik beretin bilim granty saltanatty túrde tabystaldy, dep habarlaıdy Kazinform.
Merzimdi áskerı qyzmettiń tartymdylyǵyn arttyrý maqsatynda QR Qorǵanys mınıstrligi birqatar is-shara júzege asyrdy, sonyń biri - «Áskerı mindetti 2.0» jobasy. Áskerı boryshyn ótegen azamat osy tsıfrlyq platforma aıasynda UBT tapsyrmaı-aq elimizdegi ózi tańdaǵan joǵary oqý orynynda tegin bilim ala alady.
Bıyl joba aıasynda konkýrstyq irikteýge el kóleminde 17 253 sarbaz qatysty. Olar 2022 jylǵy kóktem jáne kúz mezgilderinde áskerge shaqyrylǵandar.
«Úmitkerlerdiń jetistikteri men kemshilikteri týraly barlyq derek Qorǵanys mınıstrliginiń saıtynda «Áskerı mindetti 2.0» tsıfrlyq platformasynda tirkelip, sol jerden kórsetken nátıjelerine baılanysty iriktelip alyndy. ıAǵnı bazaǵa áskerge kelgen kúnnen bastap sarbazdyń kórsetken nátıjesi, qyzmet atqarý kezindegi baǵalary, áskerı daıyndyqtaryna ball qoıyldy. Júıe avtomatty túrde sarbazdardyń reıtıngin shyǵaryp beredi. Sonymen qatar, sarbazdardyń áskerı ómirdegi túrli is-sharalarǵa belsendi qatysýy da eskeriledi. Keıinen barlyq balldyń qorytyndysy shyǵarylyp, eń joǵary kórsetkish kórsete bilgen sarbazǵa bilim grantyna sertıfıkat tabystalady», - deıdi Petropavl qalasy Qorǵanys isteri jónindegi basqarma bastyǵynyń orynbasary Vıtalıı Grıb.
Petropavldaǵy QR Ulttyq Ulany 6637 áskerı bóliminiń 16 sarbazy osyndaı bilim grantyna ıe boldy. Solardyń biri - Bekzat Amanjol. Ol Almaty qalasynan kelip 6637 áskerı bóliminde Otan aldyndaǵy boryshyn ótep júr. 10 aı ishinde jalpy 692 ball jınap, armandaǵan grantty jeńip aldy.
«Qatty qýanyp turmyn. Azamattyq boryshyńdy oryndap, sonymen qatar joǵary oqý ornyna grant jeńip alý kópke buıyra bermeıdi. Endi men áskerden soń Atyraý qalasyndaǵy S.Ótebaev atyndaǵy munaı jáne gaz ýnıversıtetine ınjener mamandyǵyna oqýǵa túsemin dep josparlap otyrmyn. Ózim kolledjdi baǵdarlamashy mamandyǵy boıynsha bitirgenmin», - deıdi bilim grantynyń ıegeri.
Mamandardyń aıtýynsha, bilim sertıfıkattarymen merzimdi áskerı qyzmetten ótken sarbazdar eki jyl ishinde UBT tapsyrmaı-aq joǵary oqý ornyna túse alady. Bul sarbazdar sondaı-aq ózi tańdaǵan oqý ornyndaǵy áskerı kafedraǵa emtıhansyz qabyldanady.
«Barlyǵy 1,5 myń adamǵa grant bólindi. Sonyń ishinde Ulttyq ulanǵa 621 oryn bar. Petropavldaǵy 6637 áskerı bóliminiń 16 áskerı qyzmetshisi osy grantqa laıyq boldy», - deıdi QR Ulttyq ulany 6637 áskerı bólim komandıriniń orynbasary Maqsat Muqaev.
