Petropavlda áskerı qyzmetshiler eki adamdy órtten qutqaryp qaldy
PETROPAVL. QazAqparat – Petropavlda kóshede kezekshilik etip júrgen áskerı qyzmetshiler órtengen úıden eki adamdy alyp shyǵyp, olardyń ómirlerin qutqaryp qaldy, dep habarlaıdy QazAqparat tilshisi.
Soltústik Qazaqstan oblysy tótenshe jaǵdaılar departamenti baspasóz qyzmetiniń málimetinshe, 14 naýryz kúni 6637 áskerı bóliminiń qyzmetkerleri kóshede patrýldik qyzmet atqaryp júrip, túngi saǵat 22.00 shamasynda Ýlıanov kóshesi, 19/1 meken jaıynda ornalasqan eki páterlik baspananyń órtenip jatqanyn kórgen. Sarbazdardyń bireýi telefon arqyly birden órt sóndirý qyzmeti men polıtsııaǵa habar bergen.
«Áskerı qyzmetshiler – 6 adam mamandardyń kelýin kútpeı órtenip jatqan úıge kirip, es-tússiz jatqan eki adamdy: 1966 jyly týǵan er adamdy jáne 1956 jylǵy áıel adamdy alyp shyqqan. Sondaı-aq alǵashqy medıtsınalyq kómek kórsetken. Qazir eki adamnyń da jaǵdaıy jaqsy», - deıdi SQO TJD bastyǵynyń orynbasary Oral Ábdirahmanov.
Oqıǵa ornyna jetken órt sóndirýshiler baspanadan bir gaz ballonyn shyǵardy. Órtten aýdany 60 sharshy metr bolatyn baspana tolyq janyp ketti. Al saǵat 23.16-da jalyn tolyq sóndirildi. Aldyn ala boljam boıynsha, órttiń shyǵýyna otty uqypsyz paıdalaný sebep bolǵan.
Qazirgi ýaqytta SQO TJD eki adamnyń ómirin qutqaryp qalǵan 6637 áskerı bóliminiń qyzmetkerlerin marapattaý jóninde qujattardy ázirlep jatyr.
