Petropavlda áskerı ınstıtýttyń úzdik ustazdary marapattaldy
PETROPAVL. QazAqparat – Petropavlda Muǵalimder kúni merekesi qarsańynda QR Ulttyq ulany áskerı ınstıtýtynyń bir top ustazy marapatqa ıe boldy, dep habarlaıdy QazAqparat tilshisi.
Prezıdent Q.Toqaevtyń joldaýyn júzege asyryp, QR Іshki ister mınıstriniń tapsyrmasyna saı ustazdar mártebesin arttyrý maqsatynda áskerı ınstıtýtta úzdik oqytýshyny anyqtaý maqsatynda konkýrs ótti.
Baspasóz qyzmetiniń málimetinshe, qazir joǵry oqý ornynda júzden astam ustaz eńbek etedi. Mereke qarsańynda úzdikter 15 nomınatsııa boıynsha marapattaldy.
«Memleket basshysy Qasym-Jomart Toqaev Qazaqstan halqyna joldaýynda taǵy bir márte oqytýshylardyń jas býyndy tárbıeleýdegi mańyzdy róline toqtaldy. Ustazdar qaýymy elimizdiń bolashaǵyn qalyptastyrady. Jastardyń jan-jaqty bilimdi, básekege qabiletti bolyp damýyna óz úlesterin qosady. Búgin mereke qarsańynda ustazdarymyzdy, sonyń ishinde baıqaýǵa qatysýshylar men baıqaýdyń jeńimpazdaryn – «Jyl oqytýshysyn» quttyqtaımyn. Sizder bolashaq ofıtserlerdi daıyndaýda áli de tabysty eńbek etesizder dep senemin», - dedi QR UU áskerı ınstıtýtynyń basshysy Baýyrjan Ábjanov óz quttyqtaýynda.
«Jyldyń úzdik oqytýshysy» nomınatsııasynda jalpy bilim berý pánderi kafedrasynyń oqytýshysy Baqyt Qalıev úzdik atandy. Merekelik is-shara barysynda sondaı-aq «úzdik lıngvıst», «jyldyń úzdik kýrsanty», «úzdik kafedra», «úzdik oqý batalony» sııaqty nomınatsııalar boıynsha jeńimpazdar marapattaldy.
Petropavldaǵy áskerı ınstıtýt 15 jyldyń ishinde 19 ret túlek «ushyryp», 3500 áskerı maman daıarlap shyǵardy. 2009 jyldan beri kelisim boıynsha Qyrǵyzstan jáne Tájikstan Respýblıkalaryna da ofıtser daıarlap keledi.
