Petropavlda Áskerı ınstıtýttyń esepshisi 28 mln teńgeni qaltasyna basqan
Bul týraly SQO Sybaılas jemqorlyqqa qarsy qyzmet jetekshisiniń orynbasary Sergeı Potanın «Antıkor ortalyǵy» alańynda málim etti.
Soltústik Qazaqstan oblysy boıynsha Sybaılas jemqorlyqqa qarsy qyzmeti QR Ulttyq ulany Áskerı ınstıtýty esepshisi qylmystyq quqyq buzýshylyq jasady degen kúdikpen qylmystyq isti tergedi.
«Kúdikti uzaq ýaqyt boıy Áskerı ınstıtýttyń qarjy bólimshelerinde qyzmet etken. Ol ofıtserlik quramnyń, kelisimshart boıynsha jumys isteıtin áskerı qyzmetshilerdiń jáne áskerı ınstıtýttyń azamattyq qyzmetshileriniń bos laýazymdary esebinen aı saıyn bıýdjet qarajatynyń únemdelýi qalyptasatynyn biledi. Bul qarajatty óz paıdasyna jaratý úshin kúdikti áskerı ınstıtýttyń áskerı jáne azamattyq qyzmetshileriniń derbes derekterin óziniń, jubaıynyń, sondaı-aq osy ınstıtýtta áskerı qyzmette turǵan dostary men tanystarynykine aýystyryp, únemdeýden túsken qarajatty olarǵa aýdarǵan», - dedi Sergeı Potanın.
Sybaılas jemqorlyqqa qarsy vedomstvo habarlaǵandaı, kúdikti 2014 jyldyń shilde aıynan bastap 2019 jyldyń mamyr aıyna deıingi merzimde ázirlengen shema boıynsha Áskerı ınstıtýt arqyly memleketke asa iri kólemde - 27,8 mln teńge shyǵyn keltirdi. Zańsyz aýdarylǵan aqshany ol óz qajetine jumsap kelgen. Búginde is sotta qaralyp jatyr.
Budan basqa, sybaılas jemqorlyqqa qarsy qyzmet osy quqyq buzýshylyqqa jol bergen Áskerı ınstıtýttyń kináli tulǵalaryn óz laýazymdyq mindetterin tıisinshe oryndamaǵany jáne tıisti vedomstvolyq baqylaýdy jasamaǵany úshin qatań tártiptik jaýapkershilikke tartý týraly usynys berdi.