Petropavlda áskerı boryshyn óteý kezinde qaza tapqan sarbazdardy eske alý mıtıngisi ótti

PETROPAVL. QazAqparat – Petropavldaǵy Ulttyq ulan áskerı ınstıtýtynda áskerı boryshyn óteý kezinde qaza tapqan Ulttyq ulan áskerı qyzmetshileriniń erligine arnalǵan mıtıng ótti, dep habarlaıdy QazAqparat tilshisi.

QR Ulttyq ulan áskerı ınstıtýty baspasóz qyzmetiniń málimetinshe, mıtıng barysynda Áskerı ınstıtýttyń jeke quramy qaza tapqandardy bir mınýt únsizdikpen eske aldy jáne sońynda saltanatty marshpen ótti.

«Áskerı ınstıtýt qolbasshylyǵynyń, ardagerler keńesiniń, ǵylymı keńestiń atynan jáne jeke óz atymnan qaza tapqan jaýyngerler men polıtsııa qyzmetkerleriniń týystary men jaqyndaryna qaıǵyryp kóńil aıtamyn. Bul biz jáne barlyq qazaqstandyqtar úshin orny tolmas qaıǵy», - dep atap ótti áskerı ınstıtýttyń bastyǵy Baýyrjan Ábjanov.

Eldegi jappaı tártipsizdikter kezinde qaýipsizdikti qamtamasyz etý barysynda Ulttyq ulannyń eki áskerı qyzmetshisi qaza tapty. Jas sarbazdar halyqtyń tynyshtyǵy men amandyǵy úshin qoıylǵan mindetterdi erlikpen oryndady.

Qatardaǵy jaýynger Madııar Qaısarov 5 qańtarda jedel bólimshe quramynda Qyzylorda qalasyndaǵy qoǵamdyq tártipti qalpyna keltirý barysynda jaýyngerlik mindetti oryndaı otyryp, aýyr jaraqat aldy. Ol áskerı antqa adal bolyp, Otanyn qorǵaý boıynsha konstıtýtsııalyq boryshyn sońyna deıin oryndady. Jaýynger alǵan jaraqattarynan qaıtys boldy.

«Osy kúni gvardııashy Aıbat Amanov ta Taldyqorǵan qalasynda buzaqylar men maroderlermen shaıqas barysynda qaza tapty. Eki sarbaz da óte jas – 18-19 jasta ǵana. Madııar Qaısarov pen Aıbat Amanovtyń esimderi Qazaqstan Respýblıkasy Ulttyq ulanynyń erlik shejiresine máńgige enedi», - dedi Baýyrjan Ábjanov.