Petropavlda «ASHYQ» jobasyna 60-qa jýyq nysan qatysyp jatyr

PETROPAVL. QazAqparat – Petropavlda «ASHYQ» jobasyna qatysqan nysandar sany artyp keledi. Olardyń ishinde sport, mádenıet, qoǵamdyq tamaqtaný jáne kóńil kóterý oryndary bar, dep habarlaıdy QazAqparat tilshisi.

Soltústik Qazaqstan oblysy kásipkerler palatasy baspasóz qyzmetiniń málimetinshe, «ASHYQ» jobasyna osy kúnge deıin 56 kásipker qosyldy. QR-kod alǵandardyń ishinde 37 nysan bar. Onyń ishinde 2 fıtnes ortalyq, 4 kınoteatr, 3 teatr, fılarmonııa men basseın, 21 qoǵamdyq tamaqtaný orny, 2 saýna, bılıard klýby, kompıýter klýby men meımanhana bar. Taǵy 19-y test rejıminde jumys istep jatyr.

«Test rejıminde jumys istep jatqandardyń ishinde ýnıversıtettiń 7 korpýsy, áskerı bólim men áskerı ınstıtýt bar. «ASHYQ» jobasyna qosylý lokdaýn kezinde juyms isteýge múmkindik beredi. Sol sebepti jobaǵa qosylýǵa nıet bildirgenderdiń qatary artyp keledi. Qazir bizdiń qaraýymyzda taǵy 30 shaqty ótinish jatyr», - deıdi SQO kásipkerler palatasynyń dırektory Arman Orazǵulov.

Alaıda, nysandar tıisti talapty oryndamaǵan jaǵdaıda jobadan shyǵyp qalýy múmkin.

«Monıtorıngtik top tekseris barysynda nysannyń talapty buzǵany, ıaǵnı olardyń kelýshilerge 3 kúnnen artyq check-in júrgizbegeni anyqtalsa jobadan 2 aptaǵa shyǵarylady. Eger ekinshi ret qaıtalansa 2 aıǵa jobadan qýylady», - deıdi Arman Orazǵulov.