Petropavlda asa iri mólsherde bıýdjet aqshasyn jegender sottaldy

PETROPAVL. KAZINFORM – Petropavlda memleket qarjysyn jymqyrǵan tórteý 8 jylǵa deıin bas bostandyǵynan aıyryldy, sondaı-aq 805 mln teńge keltirilgen zalaldy óteıdi.

Soltústik Qazaqstan oblystyq soty baspasóz qyzmetiniń málimetinshe, Petropavl qalalyq soty asa iri mólsherde múlikti urlaý, qylmystyq jolmen alynǵan kiristerdi zańdastyrý jáne zańsyz kásipkerlikpen aınalysý derekteri boıynsha qylmystyq isti qarap, tórt adamǵa úkim shyǵardy.

Sot otyrysynda anyqtalǵandaı, «Petropavl qalasy ákimdiginiń sarqyndy sýlardy tazartý, sý burý jáne sý ótkizý qurylystary» MKK dırektorynyń mindetin atqarýshy B. 2019–2021 jyldar aralyǵynda kásiporyn atynan kommertsııalyq uıym quryp, senimdi tulǵa arqyly zańsyz kásipkerlik qyzmet júrgizgen. Ol ózge sybaılastarymen birlesip, osylaısha memleket qarjysyn talan-tarajǵa salǵan.

2020–2022 jyldar aralyǵynda B. kásiporyn qyzmetkerleri jáne bir mezgilde merdiger uıymdardyń basshylary Sh., ıA. jáne M.-men qylmystyq sóz baılasýǵa baryp, jalǵan sharttar jasasý arqyly bıýdjet qarajatyn jymqyrǵan. Bul áreketter saldarynan memleketke asa iri mólsherde materıaldyq zııan keldi.

Sot derekterine sáıkes, urlanǵan qarajatty B. qolma-qol aqshaǵa aınaldyryp, ony jeke maqsatqa - turǵyn úı salý men jeke múlik satyp alýǵa jumsaǵan.

Prokýror basty sottalýshy B.-ny 8 jylǵa, al Sh., ıA. jáne M.-nyń árqaısysyn 7 jyl 6 aıǵa bas bostandyǵynan aıyrý jazasyn taǵaıyndaýdy surady. Sottalýshylar óz kinásin moıyndamady.

Sot úkimimen B. 8 jylǵa bas bostandyǵynan aıyryldy. Sh., ıA. jáne M. – árqaısysy 7 jyl 6 aı merzimge sottaldy. Barlyǵy ómir boıyna memlekettik qyzmette jumys isteý quqyǵynan aıyryldy. 

Qylmystyq jolmen alynǵan múlik tárkilenip, memleket kirisine aýdaryldy. Budan bólek sottalǵandar memleketke 805 mln teńgeden astam zalaldy óteýge mindetteldi.

Buǵan deıin Petropavlda jolǵa jatyp alǵan áıeldi qaǵyp óltirgen júrgizýshi sottalǵanyn jazǵan edik.