Petropavlda asa iri kólemdegi esirtkimen ustalǵan astanalyqqa baılanysty tergeý bastaldy

PETROPAVL. KAZINFORM - Petropavlda polıtseıler Astana turǵynyn ustap, odan jarty kılogramnan astam «sıntetıkalyq» esirtki tárkiledi. 

Soltústik Qazaqstan oblystyq polıtsııa departamenti baspasóz qyzmetiniń málimetinshe, jigit Petropavlǵa sıntetıkalyq esirtki zattaryn taratý maqsatynda kelgen. Ony quqyq qorǵaý organdary men Ulttyq qaýipsizdik komıtetiniń SQO boıynsha departamenti qyzmetkerleri sáýir aıynda birlesken is-shara barysynda ustady.

Kúdikti turǵan jaldamaly páterden jáne onyń aıtýymen jasyrylǵan oryndardan jalpy salmaǵy 0,5 kılogramnan asatyn untaq tárizdi zat salynǵan oramalar tárkilendi. Saraptama olardyń quramynda sıntetıkalyq «α-PvP» jáne «mefedron» esirtkileri baryn kórsetti. Qazir osy fakti boıynsha tergeý júrgizilip jatyr.

Bul — bıyl polıtseıler tárkilegen eń iri kólemdegi sıntetıkalyq esirtki partııasy. Jalpy, qańtar aıynan beri oblysta 139 esirtkige qatysty quqyq buzý tirkeldi, onyń 66-sy — satý faktileri. 40 keliden astam túrli esirtki jáne psıhobelsendi zattar tárkilengen.

Buǵan deıin SQO-da alty turǵyn esirtki bıznesimen aınalysyp kelgenin jazǵan edik.