Petropavlda áriptesin óltire jazdaǵan túrme qyzmetkerine úkim shyqty

Petropavl qalalyq soty Soltústik Qazaqstan oblysy boıynsha qylmystyq atqarý júıesi departamenti №52 mekeme bastyǵynyń tárbıe jumysy jónindegi orynbasary Arman Altaıbekovke úkim shyǵardy. Áriptesin kólikpen qaǵyp, keıin ony buta arasyna tastap ketken kolonııa qyzmetkeriniń bas bostandyǵy bir jylǵa shekteldi, dep habarlaıdy Kazinform.

Oqıǵa bıyl mamyr aıynyń sońynda bolǵan. Petropavl qalalyq sotynyń málimetinshe, SQO boıynsha QAJD №52 mekeme bastyǵynyń tárbıe jumysy jónindegi orynbasary Arman Altaıbekov túngi saǵat 1:30 shamasynda Mamlıýtka qalasy jaǵynan Petropavlǵa kele jatyp, adam qaǵyp ketedi.

Keıin qatty jaraqattanǵan er adamdy kóliginiń artqy oryndyǵyna jatqyzyp, oqıǵa ornynan ketip qalady.

Jolda zardap shegýshini butalardyń túbine tastap ketken.

Osylaısha kólik soqqan er adam aıdalada 8 saǵat qansyrap jatyp qalǵan.

Zardap shegýshi - № 50 mekemeniń baqylaý qyzmeti bóliminiń qaraýyl bastyǵy bolyp shyqty.

Qylmystyq is úsh bap boıynsha qaraldy.

Kezdeısoq jaǵdaıda jáne alǵash ret qylmystyq teris qylyq jasaýy, jas balalarynyń bolýy, qylmys barysynda keltirilgen moraldyq jáne ózge de zııannyń ornyn óz erkimen toltyrýy, istegen isine shyn júrekten ókinýi – úkimdi jeńildetetin jaǵdaı retinde qaraldy.

Sondaı-aq turǵylyqty jeri men jumysynan oǵan oń baǵa berilýi, jábirlenýshiniń moraldyq zııannyń orny toltyrylǵanyn aıtyp, sottalýshyny bas bostandyǵynan aıyrmaýdy suraýy úkim shyǵararda eskerildi.

«Sottalýshynyń bas bostandyǵyn bir jylda shekteý jazasy taǵaıyndalsyn. Arman Altaıbekov úsh jylǵa kólik quraldaryn basqarý quqyǵynan aıyryldy. Sondaı-aq ol 1 jyl probatsııalyq baqylaýda bolady. Budan bólek, taǵaıyndalǵan jaza merzimi aıaqtalǵansha Altaıbekov, jergilikti atqarýshy organdar aıqyndaıtyn oryndarda jyl saıyn 100 saǵattan, biraq kúnine tórt saǵattan aspaıtyn májbúrli eńbekke tartylsyn», – delingen sot úkiminde.
Sondaı-aq Altaıbekov ádilet kapıtany degen arnaıy ataǵynan aıyryldy.