Petropavlda arnaýly áskerı jıynǵa 39 adam shaqyryldy

PETROPAVL. QazAqparat – Prezıdenttiń áskerı mindettilerdi arnaýly jıynǵa shaqyrý týraly Jarlyǵyna oraı Petropavlda 39 adam qyzmettik boryshyn óteýge kiristi, dep habarlaıdy QazAqparat tilshisi.

Arnaýly áskerı jıynǵa qabyldanǵandardyń basym bóligi – Otanǵa qyzmet etý úshin jergilikti áskerı komıssarıatqa óz erkimen kelgender. SQO Qorǵanys isteri jónindegi departamentiniń málimetinshe, óńirdiń áskerı mindetti 50 shaqty azamatynan ótinish túsken. Nıet bildirgenderdiń eń aldymen densaýlyǵyna basa nazar aýdaryldy.

«Densaýlyǵynan bólek jas shamasy da eskerildi. Otbasylyq jaǵdaıyna da qaradyq. Úsh jáne odan da kóp balasy barlardy jıynnan bosattyq. Negizgi jumysynda qansha eńbekaqy alsa, sonsha tólenetin bolady. Al eger jumys istemese nemese karantınniń jarııalanýyna baılanysty jumysynan shyǵyp qalsa onda 42 myń 500 teńge eńbekaqy alady», - deıdi SQO Qorǵanys isteri jónindegi departament basshysy Talǵat Áliqulov.

Petropavldan arnaıy áskerı jıynǵa 39 adam qabyldandy. Olardyń jastary 22 men 44 aralyǵynda. Áskerı qyzmetshiler Petropavl kóshelerin, qoǵamdyq oryndardy zararsyzdandyratyn bolady.

«Ázirshe 20 kúnge shaqyryldy. Barlyǵy Petropavl qalasynyń turǵyndary. Tańǵy saǵat 9.00-den keshki 18.00 deıin jumys isteıdi. Búgin tańerteń olardy qajetti kıim-keshekpen qamtydyq. Sondaı-aq koronavırýs ınfektsııasyna tekserip test aldyq. Qolǵa alynǵan is-shara elimizdiń tezirek qalypty ómirge oralýy úshin, halqymyzdyń densaýlyǵy úshin jasalyp jatyr», - deıdi SQO ákiminiń qaýipsizdik jáne qorǵanys áskerı qyzmet jónindegi kómekshisi Dáýlet Tolybaı.

Esterińizde bolsa, buǵan deıin Jambyl oblysynan arnaıy kelgen 50 áskerı qyzmetshiniń Petropavl kóshelerin dezınfektsııalap jatqanyn aıtqan edik.