Petropavlda ári mas kúıde, ári jalǵan qujatpen kólik júrgizgen er adam ustaldy

Soltústik Qazaqstan oblysy polıtsııa departamenti baspasóz qyzmetiniń málimetinshe, Petropavldaǵy Shýhov kóshesinde patrýldik polıtsııa batalonynyń qyzmetkerleri «VAZ-2114» kóligin toqtatqan. Kólikti tizgindegen 33 jastaǵy qala turǵyny mas bolyp shyqty. Derekter bazasynan júrgizýshi kýáligin tekserý kezinde qujattyń bógde adamnyń atyna jazylǵany belgili boldy.

Atalǵan fakti QR Qylmystyq kodeksiniń 385-baby «Jalǵan qujattardy, mórtabandardy, mórlerdi, blankilerdi, memlekettik poshta tólemi belgilerin, memlekettik nagradalardy qoldan jasaý, daıyndaý nemese ótkizý» boıynsha Sotqa deıingi tergep-tekserýlerdiń biryńǵaı tizilimine engizildi. Saraptama taǵaıyndaldy. Onyń nátıjesi boıynsha túpkilikti protsestik sheshim qabyldanbaq. Sonymen qatar, mas kúıde kólik basqarǵany úshin er adam sot sheshimimen 20 táýlikke ákimshilik qamaqqa alyndy. Mashına arnaıy turaqqa qoıyldy.

SQO-da bıyl júrgizýshi kýáliginen aıyrylsa da qaıta mas kúıde kólik júrgizgen 117 adam anyqtaldy.