Petropavlda apattyń saldarynan temir joldy sý basty
PETROPAVL. QazAqparat – Petropavlda sý jelisinde bolǵan apat saldarynan temirjoldy sý basty, sondaı-aq birneshe eki qabatty úı aýlasyna jáne kásiporyn aýmaǵyna sý kirdi, dep habarlaıdy QazAqparat tilshisi.
Petropavldaǵy 314-shi atqyshtar dıvızııasy kóshesinde túnde sý qubyry jarylyp, qaladaǵy birneshe shaǵyn aýdan sýsyz qalǵan edi. Qazirgi ýaqytta tek «Bereke» aýdanynda jáne Jumysshy kentinde sý joq.
«Qyzyljar Sý» JShS sý magıstralindegi apatqa qatysty túsinik berdi.
«Túngi saǵat 01.00 shamasynda «Petropavlda sý qysymy tómendep ketti» degen habar tústi. Osydan keıin mamandar oqıǵa ornyna shyqty. Ońtústik-Batys sý jelisinde dıametri 800 mm sý qubyry jarylǵan eken. Bul sý magıstrali 2009 jyly jańǵyrtylǵan. Qazirgi ýaqytta qubyrdyń jarylýyna ne sebep bolǵany anyqtaldy, Maǵjan Jumabaev kóshesindegi jaǵdaı qaıtalanyp otyr, ıaǵnı eki qubyrdyń qosylǵan jeri ajyrap ketken.
Qazirgi ýaqytta qysymdy joǵarylatý úshin jumys istep jatyrmyz. Zaqymdanǵan jerdi aýystyrýǵa qajet zattar bar, jumys atqarylýda», - deıdi «Qyzyljar Sý» JShS atqarýshy dırektory Arman Saýytov.
Kásiporyn basshysynyń aıtýynsha, qubyrdyń jarylýynan temirjol ýchaskesin sý basty. Sondaı-aq «Radýga» JShS-niń aýmaǵyna jáne birneshe eki qabatty úıdiń aýlasyna sý kirdi. Ol jerlerde brıgadalar jumys istep, sýdy arnaıy tehnıkamen soryp jatyr. Turǵyndarǵa taza sý da jetkizildi.
«Aıaz jumysty qıyndatty. Sondyqtan qazir apat bolǵan jerdi ústinen jaýyp, qalǵan jumysty sonyń ishinde atqaramyz. Sondaı-aq eki qubyr qosylǵan jerdi de jylytýymyz kerek, óıtkeni olar durys qabysýy úshin temperatýra jyly bolýy qajet. Bizge qubyrdy qalpyna keltirýge bir táýlik ýaqyt kerek. Qazir munda 8 brıgada jumyldyrylǵan.
Bul bıyldyqqa osymen úshinshi iri apat. Ekeýinde bir merdiger kompanııa jumys istegen. Olar qazir joq, bul fırma jumysyn toqtatqan. Sondyqtan bul joly barlyq shyǵyndy ózimiz óteımiz», - deıdi Arman Saýytov.
