Petropavlda apattyq baspananyń ornyna eki kópqabatty turǵyn úı salynady
PETROPAVL. QazAqparat - Petropavlda qala ákimi Marat Tasmaǵambetovtiń turǵyndar aldyndaǵy birinshi eseptik kezdesýi ótti, dep habarlaıdy QazAqparat tilshisi.
Apattyq úılerde turatyndar úshin bul esepte tórt úıdiń qulatylatyny týraly aqparat óte mańyzdy boldy.
«Byltyr Eskirgen jáne apattyq úılerdi buzý baǵdarlamasy aıasynda «K. Sútishev, 38», «Oral, 3» jáne «Oral, 4» mekenjaılaryndaǵy úsh úı buzyldy. Bıyl osy «Pervomaıskıı, 2» mekenjaıynda ornalasqan 4 apattyq úıdi qulatý josparlanyp otyr. Onyń ornyna eki 93 páterli úı boı kóteredi», - dedi M.Tasmaǵanbetov.
Byltyr «Oral, 3» jáne «Oral, 4» mekenjaıyndaǵy úılerdiń qabyrǵasy qırap, soǵan baılanysty jospardan tys qulatylǵan edi. Sol kezde Petropavlda 19 apattyq úı bolǵan.
Budan bólek, «Jas Órken» shaǵyn aýdanynda eski baspanalar qıratylyp, jerdi tegistep jatyr. Onyń ornyna jańa kópqabatty úıler salynady. Qala ákimniń aıtýynsha, munda turǵyn úı kesheni men eki kópqabatty turǵyn úıdiń qurylysy bastalyp ketken. Bıyl qoldanysqa berýge ýáde etti.
«Budan buryn qalanyń osy bóliginde jeke eski úıler ornalasqan edi. Oblystyq bıýdjetten qarjy bólinip, 635 úı buzyldy. Olardyń barlyǵy 40-50-jyldary salynǵan eken. 2500 páterli 10 turǵyn úı salý josparda bar. Sondaı-aq, osy jerde mektep jáne qazaq drama teatrynyń qurylysy bastalyp ketti», - dep atap ótti M.Tasmaǵanbetov.
