Petropavlda alty oqýshy qyz qatarlasyn bopsalap, uryp-soqqan
PETROPAVL. KAZINFORM — Petropavlda áleýmettik jelide oqýshy qyzdy birneshe jasóspirim qyzdyń qorqytyp, kúsh kórsetken beınejazbasy tarady.
Oqıǵa byltyr 31 tamyzda bolǵan eken.
Soltústik Qazaqstan oblysy bilim basqarmasy osy jaıtqa qatysty resmı aqparat berdi.
— Kámelet jasqa tolmaǵan qyz balaǵa qatysty bopsalaý jáne býllıng belgileri bar beınejazbany mekteptiń áleýmettik pedagogi áleýmettik jelilerdi baqylaý barysynda anyqtady. Mektep ákimshiligi bul týraly bıyl 12 mamyrda aqparat alǵannan keıin, óz quzyreti aıasynda dereý áreket etip, quqyq qorǵaý organdaryna habarlady. Mektepte jasóspirimder arasyndaǵy quqyq buzýshylyqtardyń aldyn alý jónindegi kezekten tys Keńes otyrysy ótip, oǵan mektep ınspektory da qatysty. Osy oqıǵaǵa qatysy bar 6 jasóspirimge qatysty materıaldar jedel jınalyp, kámeletke tolmaǵandardyń isteri jáne olardyń quqyqtaryn qorǵaý jónindegi komıssııanyń qaraýyna joldandy. Qazirgi ýaqytta osy oqýshylardy devıantty minez-qulyqty balalarǵa arnalǵan arnaıy bilim berý uıymyna jiberý máselesi qaralyp jatyr, — delingen habarlamada.
Vedomstvonyń málimetinshe, osy fakt boıynsha ýákiletti quqyq qorǵaý organdary tergeý jumystaryn júrgizip jatyr. Zardap shekken oqýshymen pedagog-psıholog jumys júrgize bastady.
— Bul oqıǵa QR Qylmystyq kodeksiniń 194-baby 2-bóligi 1, 2-tarmaqtary boıynsha (aldyn ala sóz baılasý arqyly adamdar toby jasaǵan bopsalaý) Petropavl qalalyq polıtsııa basqarmasynyń biryńǵaı tergeý reestrinde tirkeldi. Bul bap boıynsha 3 jyldan 7 jylǵa deıin bas bostandyǵyn shekteý nemese sol merzimge bas bostandyǵynan aıyrý, sondaı-aq múlkin tárkileý qarastyrylǵan, — delingen habarlamada.
Buǵan deıin balasy býllıngke ushyraǵan ata-ana ne isteý qajettigi týraly zańgerdiń keńesin bergen edik.