Petropavlda alımentten qashqan ákeniń qaryzy 1,5 mln teńgeden asyp ketken
PETROPAVL. QazAqparat - Soltústik Qazaqstan polıtseıleri boryshkerlerdi izdeý boıynsha úsh kúndik aktsııa júrgizdi, dep habarlaıdy QazAqparat tilshisi.
Polıtsııa departamenti baspasóz qyzmetiniń aqparatyna súıensek, aktsııa basynda kóshi-qon polıtsııa basqarmasynyń óndirisinde 133 izdestirý isi bolǵan.
Tártip saqshylary kishkentaı qyzyna tólemegen alımenti 1,5 mıllıon teńgege jetken petropavldyqtyń turatyn jerin anyqtady. Al ózi budan múldem beıhabar ekenin aıtyp, aqtalǵan.
«QR zańnamasyna sáıkes, izdeý salynǵan boryshker nemese alıment tólemeı júrgen adam ekinshi ret jasyrynsa, qylmystyq jaýapqa tartylady. Ol úsh jyl merzimge deıin bas bostandyǵynan aıyrylýy múmkin», - deıdi basqarma bastyǵy Talǵat Ábilov.
Polıtseıler boryshkerlerdi izdeýdiń mashaqaty kóp ekenin aıtady. Boryshyn tóleýden jaltarǵandar jıi páter almastyryp, keıbiri tipti elden shyǵyp ketetin kórinedi.
Úsh kún ishinde tártip saqshylary 27 adamnyń mekenjaıyn anyqtady. Sonyń 15-i qaryzdy bolsa, 8-i alıment tólemegen. Al qalǵan tórteýin týystary izdegen.
