Petropavlda Alık Shpekbaev pen Qumar Aqsaqalov voleıbol oınady
PETROPAVL. QazAqparat - Petropavl qalasynda Alık Shpekbaev pen Qumar Aqsaqalov Soltústik Qazaqstan oblysynyń qoǵam ókilderimen voleıbol oınady, dep habarlaıdy QazAqparat tilshisi.
Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamenti baspasóz qyzmetiniń habarlaýynsha, A. Vınokýrov atyndaǵy Sport saraıynda MQІSQA jáne Soltústik Qazaqstan oblysy ákimdiginiń qyzmetkerleri aımaq jurtshylyǵynyń qurama komandasymen voleıbol oınady.
Oıyn 3-2 esebimen memlekettik qyzmetshiler paıdasyna aıaqtaldy. Alaıda matchqa qatysýshylar basty kórsetkish tabloda emes, beıresmı jaǵdaıda tanysyp, sóılesýge berilgen múmkindik bolǵanyn atap ótti.
«Munda taraptar bir-birine qarsy emes. Bul joldastyq kezdesý. Oblystyń memlekettik qyzmetshileri men jurtshylyǵy beıresmı jaǵdaıda tanysyp, joldastyq qarym-qatynas ornatyp, bir-birin jaqsy túsinip, memleket pen qoǵam arasyndaǵy iskerlik qarym-qatynasty jolǵa qoıý úshin ótkiziledi. Sonymen qatar, atalmysh kezdesý - bul memlekettik qyzmet isteri agenttiginiń jáne oblys ákimdiginiń ashyqtyǵyn kórsetedi», - dedi Memlekettik qyzmet isteri jáne sybaılas jemqorlyqqa qarsy is-qımyl agenttiginiń SQO boıynsha departamentiniń basshysy Elena Stepanenko.
Sondaı-aq atalmysh matchtyń negizgi maqsaty - salamatty ómir saltyn nasıhattaý, korporatıvtik rýhty qalyptastyrý.
