Petropavlda alǵashqy úsh adam Armenııadan ákelingen kóligin tirkedi
Soltústik Qazaqstan oblysy polıtsııa departamenti baspasóz qyzmetiniń málimetinshe, kúnniń alǵashqy jartysynda Mamandandyrylǵan halyqqa qyzmet kórsetý ortalyǵyna Armenııadan ákelingen kólikterin ýaqytsha tirkeý úshin Petropavldyń úsh turǵyny júgindi.
Solardyń biri - Dýlat Ábishev 2011 jyly shyqqan Hyundai Elantra avtokóligin byltyr jeltoqsan aıynda elge ákelgen. Ol zańnamadaǵy jańashyldyqtardy estı salysymen birden alǵashqy kúni qajetti qujattardy jınap, resimdeýdi sheshken.
«Memlekettiń óz azamattary úshin osyndaı sheshim qabyldaǵanyna qýanyshtymyn. 12 myń teńge tólep, kólikti ózimniń atyma resimdeı alamyn. Zańdy túrde elimizdiń joldarynda júrip-turýǵa múmkindik týdy», - deıdi qala turǵyny.
Qazaqstandyqtar Armenııadan ákelingen kólikterin 1 maýsymnan bastap turǵylyqty eldimekenderi boıynsha tirkeı alady. Qazir ákimshilik polıtsııa qyzmetkerleri avtokólik ıeleriniń tirkeýge baılanysty týyndaǵan suraqtaryna jaýap berý maqsatynda keń aýqymdy túsindirý jumystaryn júrgizýde. Polıtsııa departamentinde «qaýyrt jeli» jumys isteıdi. Sondaı-aq, tirkeý –emtıhan alý bóliminiń qyzmetkerleri halyqtyń kólikterdi tirkeý barysynda týyndaıtyn suraqtaryna jaýap berý úshin mamandandyrylǵan halyqqa qyzmet kórsetý ortalyqtaryna ornalasyp, kezekshilik etýde.
«Armenııa Respýblıkasynyń ýákiletti organdarynda Qazaqstan azamattaryna tirkelgen jáne Qazaqstanǵa 2020 jyldyń 1 aqpanyna deıin ákelgen avtomobılder tirkeýge jatady. Osyndaı kólik quraldaryn tirkeýmen baılanysty basqa da máseleler boıynsha biz túsindirý jumysyn júrgizip jatyrmyz. Resimdeý quny - 11 946 teńge. Buǵan tirkeý úshin tólem, kólik quralynyń tirkelý kýáligi men memlekettik tirkeý nómiri úshin memlekettik baj salyǵy kiredi», - dedi SQO PD ákimshilik polıtsııa basqarmasynyń bastyǵy Jasulan Ospanov.
