Petropavlda alǵashqy Qazaqstan-Qytaı agrarlyq tehnologııalar jáne eksportty damytý tehnoparki qurylady
PETROPAVL. KAZINFORM – Petropavlda Ortalyq Azııadaǵy ǵylym, ınvestıtsııa jáne tehnologııany biriktirgen alǵashqy iri keshendi joba júzege asady.
Manash Qozybaev atyndaǵy Soltústik Qazaqstan ýnıversıteti baspasóz qyzmetiniń málimetinshe, Qytaıda ótken halyqaralyq bilim kórmesi aıasynda Qazaqstan men Qytaı arasyndaǵy yntymaqtastyqty nyǵaıtýǵa baǵyttalǵan mańyzdy kezdesý ótti. Іs-sharaǵa Qazaqstan Bilim mınıstrliginiń, Manash Qozybaev atyndaǵy Soltústik Qazaqstan ýnıversıtetiniń ókilderi jáne Henan aýyl sharýashylyǵy ınvestıtsııalyq tobynyń delegatsııasy qatysty.
Kezdesý barysynda taraptar «Qazaqstan-Qytaı agrarlyq tehnologııalar jáne eksportty damytý tehnoparki» jobasynyń júzege asyrylý barysyn talqylap, aýyl sharýashylyǵy, ǵylym jáne ınnovatsııa salalaryndaǵy áriptestikti odan ári damytý máselelerin qarastyrdy.
Tehnopark Manash Qozybaev atyndaǵy Soltústik Qazaqstan ýnıversıteti bazasynda qurylyp, ǵylymı zertteýler júrgiziledi, tájirıbelik jumystar uıymdastyrylyp, jańa tehnologııalardy engizý jumystary qolǵa alynady.
- Jobaǵa SQO ákimi Ǵaýez Nurmuhambetov bastaǵan delegatsııanyń Qytaıǵa jasaǵan sapary negiz boldy. Sol kezde Beıjiń qalasynda ýnıversıtet pen Henan aýyl sharýashylyǵy ınvestıtsııalyq toby arasynda yntymaqtastyq týraly memorandýmǵa qol qoıyldy. Bir jarym jyl ishinde qytaılyq kompanııa Ózbekstan, Malaızııa jáne Qyrǵyzstandy qosa alǵanda, birqatar elderde salystyrmaly taldaý júrgizdi. SQO-nyń ǵylymı áleýeti men ınfraqurylymdyq múmkindikterin eskere otyryp, jobany dál osy óńirde iske asyrý týraly sheshim qabyldandy, - deıdi ýnıversıtet ókilderi.
Henan aýyl sharýashylyǵy ınvestıtsııalyq toby Henan provıntsııasyndaǵy eń iri memlekettik kásiporyndardyń jáne Qytaıdaǵy jetekshi agrarlyq korporatsııalardyń biri. Kompanııanyń jyldyq aınalymy 20 mlrd AQSh dollarynan asady, al top quramyna agroónerkásiptik qyzmettiń tolyq spektrin qamtıtyn 170-ten astam enshiles kompanııa kiredi.
Qytaılyq kompanııa buǵan deıin birneshe elde zertteý júrgizip, nátıjesinde ǵylymı áleýeti men ınfraqurylymy damyǵan Soltústik Qazaqstan óńirin tańdady. Oblys ákimdigi tarapynan ýnıversıtetke 61 gektar jer telimi bólinip, jobaǵa qajetti jaǵdaılar jasalady.
Joba eki kezeńnen turady. Bastapqyda tehnopark ınfraqurylymy qalyptastyrylyp, ǵylymı-óndiristik baza qurylmaq. Bul kezeńde shamamen 10 mln AQSh dollary kóleminde ınvestıtsııa tartý josparlanǵan. Qurylys aýmaǵy 35 myń sharshy metrdi qamtyp, onyń ishinde zertteý ortalyqtary, ákimshilik ǵımarattar, qoımalar, jataqhanalar jáne zamanaýı jylyjaı keshenderi salynady.
Sonymen qatar taraptar birlesken kásiporyn quryp, tehnoparkti basqarý men damytý jumystaryn júıeli túrde júrgizýdi kózdep otyr.
Jobanyń negizgi baǵyttaryna selektsııa jáne tuqym sharýashylyǵy, aýyl sharýashylyǵy ónimdiligin arttyrý, tsıfrlandyrý, avtomattandyrý, jasandy ıntellekt tehnologııalaryn engizý, sondaı-aq ónimdi óńdeý jáne eksportty damytý kiredi. Keleshekte agroónerkásiptik keshendi tereńdetip damytý jáne joǵary qosylǵan quny bar ónimder shyǵarý josparlanǵan.
Buǵan deıin senator Ǵalıasqar Sarybaevtyń ýnıversıtetterdiń avtonomııasyn júıeli túrde arttyrýdy usynyp, depýtattyq saýal joldaǵanyn jazǵan edik.
