Petropavlda alǵash ret polıtsııa front-keńsesi ashyldy
PETROPAVL. QazAqparat - Petropavlda Soltústik Qazaqstan oblysyndaǵy alǵashqy polıtsııa bóliminiń front-keńsesi ashyldy, dep habarlaıdy QazAqparat tilshisi.
Polıtsııa departamenti baspasóz qyzmetiniń málimetinshe, endi PB keńsesiniń birinshi qabatynda, úlken hollda kelýshilerdi bólimshe qyzmetkerleri qarsy alady. Temir torly esikter men qatań ótkizý rejıminiń ornyna qala turǵyndaryn mamandar qarsy alyp, sol jerde keńester berip, túsindirý jumystaryn júrgizedi.
«Aýmaǵy 62 sharshy metrdi quraıtyn qyzmettik oryn zamanaýı talaptarǵa saı jáne qajetti kompıýterlik jabdyqtarmen tolyqtaı qamtamasyz etilgen. Front-keńse ǵımaratyna tólem júrgizý termınaly, E-gov elektrondyq úkimetiniń baǵdarlamasy bar termınal ornatylǵan. Aýdıotaspa qyzmeti bar vıdeobaqylaý júıesimen qamtylǵan», - dedi baspasóz qyzmetinen.
Polıtsııa departamentiniń bastyǵy Berik Bilálov atap ótkendeı, bul jumystyń basty maqsaty - polıtsııa qyzmetiniń ashyqtyǵy men aıqyndyǵyn kórsetý, qala turǵyndaryn qabyldaý úshin yńǵaıly jaǵdaı jasaý.
Kún saıyn Petropavl polıtsııa bólimine 100-den astam qala turǵyny túrli máselemen keledi. Munda petropavldyqtar jasalǵan qylmystar men quqyq buzýshylyqtar boıynsha shaǵymdar jazady.
