Petropavlda alǵash ret bir apta boıy QYZYLJAR MUSIC Fest halyqaralyq festıvali ótedi
PETROPAVL. QazAqparat – Petropavlda alǵash ret 1-7 shilde aralyǵynda QYZYLJAR MUSIC Fest halyqaralyq festıvali ótedi, dep habarlaıdy QazAqparat tilshisi.
Mádenıet, tilderdi damytý jáne arhıv isi basqarmasynyń málimetinshe, alǵash ret uıymdastyrylyp otyrǵan Qyzyljar Music Fest - qala turǵyndary men qonaqtary úshin Orep air formatyndaǵy aýqymdy joba. Bir apta boıy bas alańda dástúrli jáne klassıkalyq mýzyka, djaz, estrada, horeografııa óneriniń kontsertteri ótedi, «Astana-Opera» teatrynyń «Jibek saty» operasy qoıylady.
Petropavlda 1 shildede saǵat 19.00-de festıvaldiń saltanatty ashylýy ótedi, oǵan aımaqtyń ulttyq shyǵarmashylyq ujymdary men solısteri, qazaq ulttyq án aspaptar orkestri qatysady. «Segiz seri», «Álqıssa» folklorlyq ansamblderi, «Ádemaý», «Týǵan jer» bı ansamblderi, dástúrli ánshiler - Janat Aıtbaev pen Birjan Esjanov, Ǵalymjan Nurpeıisov, Erkebulan Káripov, «Qurmet» ordeniniń kavaleri Dámesh Qurmankına, sondaı-aq festıval qonaqtary Erlan Rysqalı, Nurbolat Arzamas qatyspaq.
1 shildeniń taqyryby dástúrli mýzyka bolady. 2 shilde djazǵa arnalady. Aqan seri atyndaǵy oblystyq fılarmonııanyń estradalyq jáne djaz mýzykasy orkestri, estradalyq-sımfonııalyq orkestr óner kórsetedi.
3 shilde - horeografııa. Bashqurtstan Respýblıkasynyń «Aıtýǵan» halyq bı ansambli, jergilikti bı ansamblderi kórermen kóńilin kótermek.
4 shildede Halyq ártisi Aıman Musaqodjaevanyń jáne QazUÓÝ stýdenttik sımfonııalyq orkestriniń kontsertin tamashalaýǵa bolady. Sondaı-aq osy kúni ánshi Mıras Júginisov, Aqan seri atyndaǵy oblystyq fılarmonııa ártisteri óner kórsetpek.
5 shilde - Marıo Stefano Petrodarkanyń (Italııa, bandoneon), «Astana-Opera» teatrynyń solısi Baǵdat Ábilhanov pen estradalyq-sımfonııalyq orkestrdiń qatysýymen tanymal klassıkalyq mýzykanyń keshi ótedi.
6 shilde - Aqan seri atyndaǵy oblystyq fılarmonııa ártisteriniń kontserti, «Astana Opera» opera jáne balet teatrynyń «Jibek saty» opera-farsy kórermenge jol tartady.
7 shilde - Krefeld jáne Menhengladbah qalalarynyń birikken teatrynyń solısi, QR Eńbek sińirgen óner qaıratkeri, SQO týmasy Qaıyrjan Joldybaevtyń qatysýymen gala-kontsert ótip, festıvaldiń jabylýy bolady.
