Petropavlda alǵash ret balalar ansambliniń sherýi ótti
PETROPAVL. QazAqparat - Petropavldyń birneshe aýdandarynda Balalardy qorǵaý kúnine arnalǵan merekelik shara ótti, dep habarlady «QazAqparat» HAA tilshisi.
Mereke «Shabyt sherýi» balalar jáne jastar mýzykalyq ansambliniń paradymen ashyldy. Shara Petropavlda alǵash ret ótkizildi. Oǵan 1600 adam qatysty. Mektep oqýshylary, stýdentter men pedagogtar, sport jáne mýzykalyq ujymdar, balalar men jastar mýzykalyq ansamblderi, orkestrleri N.Pogodın atyndaǵy oblystyq orys drama teatrynan bastap Táýelsizdik stellasyna deıin júrip ótti.
Jeńis saıabaǵynda «Balalar úshin birigemiz» atty erekshe bilim suranysyna ıe balalarǵa arnalǵan mereke ótti, olar úshin korrektsııalyq-damytatyn oıyndar, sporttyq-oıyn-saýyq baǵdarlamalary uıymdastyryldy.
Balalar asfaltta molbertte sýret salý baıqaýyna, robot tehnıkasy, shahmat, toǵyzqumalaq, shaǵyn fýtbol, týrıstik kópsaıystarǵa qatysty. Jas karateshilerdiń qyzyqty kórsetilimderin tamashalady. Anımatorlar, qýyrshaqtar balalar kóńilin kóterdi.
Arbatta «Ata-baba murasy - urpaqtar ıgiligi» dekoratıvtik-qoldanbaly shyǵarmashylyq kórmesi, «Ulttyq stılde aksessýralar jáne bezendirý», «Qaǵazdan jasalǵan tańǵajaıyp» sheberlik synyptary ótti.
