Petropavlda alǵash ret ákimshilik quqyq buzǵan turǵyn qoǵamdyq jumysqa tartyldy

PETROPAVL. KAZINFORM — Petropavldyń ákimshilik quqyq buzýshylyqtar jónindegi mamandandyrylǵan soty otbasynyń berekesin alǵan er adamǵa qoǵamdyq jumysqa tartý jazasyn qoldandy. 

Sot K.-ny otbasylyq-turmystyq qatynastar salasynda quqyqqa qarsy áreket jasaǵany úshin kináli dep tanydy. Oǵan 20 saǵattyq qoǵamdyq jumys túrinde ákimshilik jaza taǵaıyndaldy. 

Sonymen qatar, polıtsııa organdarynyń ótinishi boıynsha quqyq buzýshyǵa qosymsha shara qoldanylyp, 6 aı merzimge alkogoldik ishimdikterdi tutynýǵa tyıym salatyn erekshe talaptar belgilendi.

Soltústik Qazaqstan oblystyq sotynyń málimetinshe, qoǵamdyq jumystarǵa tartý ákimshilik jazalaý sharasy retinde óńirde alǵash qoldanylyp otyr. 

Bıyl 1 qyrkúıekten bastap kúshine engen Ákimshilik quqyq buzýshylyq týraly kodeksine engizilgen ózgerister men tolyqtyrýlarǵa sáıkes, endi qoǵamdyq jumys ákimshilik jaza túrleriniń biri retinde qarastyrylady. 

Qaýly zańdy kúshine birden endi jáne oryndalýy úshin Petropavl qalasy ákimdigine joldandy.

— Qoǵamdyq jumystardy engizý adamdardyń quqyqtyq sanasyn arttyrýǵa jáne qaıtalama quqyq buzýdyń aldyn alýǵa yqpal etedi, — deıdi mamandar.

Buǵan deıin Eńbek jáne halyqty áleýmettik qorǵaý mınıstrligi Áleýmettik kodekske sottalǵan zeınetkerlerge túrmedegi ýaqytynda zeınetaqy tólemin toqtata turýǵa negiz bolatyn norma engizýdi josparlaǵanyn jazǵan edik.