Petropavlda áleýmettik jeli arqyly shyrsha satamyz degen alaıaqtar kóbeıdi

Petropavlda ınternet arqyly shyrsha satyp almaq bolǵan 4 adam alaıaqqa aldandy, dep habarlaıdy Kazinform.

Petropavl qalalyq polıtsııa basqarmasynyń málimetinshe, polıtsııanyń kezekshi bólimine 41 jastaǵy qala turǵyny ınternet-alaıaqtardyń qurbany bolǵany týraly ótinishpen júgindi.

Onyń aıtýynsha, Instagram áleýmettik jelisinde ol jasandy shyrsha satatyn «green.trees.kz» onlaın-dúkenin tapqan.

Satýshyǵa taýar úshin 54 myń teńge somasynda aldyn ala tólem jasaǵan.

Bir aptadan keıin petropavldyq onymen habarlasýǵa tyrysqanymen, alaıaq ony buǵattap tastaǵan. Jábirlenýshi amalsyzdan polıtsııaǵa júgindi.

Bul fakt QR Qylmystyq kodeksiniń 190-baby 4-tarmaǵynyń 2-bóligi boıynsha sotqa deıingi tergep-tekserýlerdiń biryńǵaı tiziliminde tirkelgen.

Instagram jelisindegi green.trees.kz, winter_holidayss jáne green_city_lux onlaın-dúkenderi jalǵan, olar jurtty aldap, joq shyrshalardy satyp jatyr.

Alaıaqtar tutynýshylardy kóptep tartý úshin tómen baǵa qoıǵan jáne aqysyz jetkizemiz dep quryqqa túsiredi.

- Halyqty tekserilmegen onlaın-dúkenderden taýar satyp almaýǵa shaqyramyz. Internet jelisinde barynsha qyraǵy bolý, aldyn ala tólemdi jáne taýardyń tolyq qunyn tólemeý kerek. Jarnamalardy muqııat tekserip, dúkenderdiń túpnusqalyǵyn teksergen jón, - deıdi polıtsııa qyzmetkerleri.

Dál osylaı taǵy 3 adam alaıaqqa aldanǵan. Qazir sot aldy tergeý júrip jatyr.