Petropavlda áleýmettik jeli qaharmany atanǵan kýrsant marapattaldy
PETROPAVL. QazAqparat – Petropavlda áleýmettik jelidegi beınerolık arqyly kópshiliktiń súıispenshiligine bólengen kýrsant eleýsiz qalmaı, marapattaldy, dep habarlaıdy QazAqparat tilshisi.
Sanjar Aqanuly bir sátte jeli «juldyzyna» aınaldy. QR Ulttyq ulanynyń Akademııasynda bilim alatyn 2 kýrs kýrsanty óziniń áleýmettik beınerolıkke keıipker bolǵanyn bilmeı qalǵan. Tek kóshede kómek suraǵan boıjetkenge kómektesip, ony jábirleýshisinen qorǵamaq bolypty.
«Sol kúni demalys alyp kóshege shyqqan edim. Bir qyz jaqyndap, «Kómektesińizshi, ol meni urady» dedi. Men Otan qorǵaýshymyn, ári otbasyndaǵy tárbıem jaı ótip ketýge jibermedi. Barynsha qorǵaýǵa tyrystym», - deıdi Sanjar Aqanuly sol kúndi eske alyp.
Nátıjesinde akterler bul kórinistiń aldyn-ala oılastyrylǵan áleýmettik zertteý ekenin aıtqan, kýrsantqa mán-jaıdy túsindirgen. Sondaı-aq, azamattyq minez tanytqanyna alǵys bildirdi.
Sanjar Aqanulyn Ulttyq ulan Bas qolbasshysy orynbasarynyń atynan alǵys hatpen jáne Ulttyq ulan Akademııasy bastyǵynyń gramotasymen áskerı oqý ordasynyń jetekshisi Artýr Toqyshev tabys etti.
Áskerı forma kıgen jigittiń batyldyǵy kópti tánti etti. Onyń áreketi qazaqstandyqtardyń júregin jaýlap aldy. Búginde bul beınerolık 5 mln astam qaralǵan.
