Petropavlda áleýmettik jeli arqyly esirtki satqan qala turǵyny ustaldy
SQO Polıtsııa departamenti baspasóz qyzmetiniń málimetinshe, tártip saqshylary oblys turǵynynan 500 gramm sıntetıkalyq esirtkini tárkilegen. Bul asa iri kólem bolyp esepteledi. 28 jastaǵy jigit esirtkige qatysty qylmysy úshin buǵan deıin jazasyn ótegen. Tergeý barysynda onyń 3,5 myń oqyrmany bar «Telegram» kanaly arqyly saýda júrgizgeni anyqtaldy. Sıntetıkalyq esirtkini qalanyń yqshamaýdandarynda aldyn ala jasyryp, onlaın satyp otyrǵan.
Kúdikti ótken beısenbi kúni oblys ortalyǵynda esirtkige elitken kúıinde ustaldy. Ol mingen taksıdi tekserý kezinde birneshe orama sıntetıkalyq esirtki tabyldy. Al negizgi bóligin, satýǵa daıyn turǵan 400 gramm spaısty polıtseıler kúdiktiniń páterinen tapty. Sondaı-aq mamandar baspanadan sıntetıkalyq esirtkini daıarlaýǵa qajet untaqty, elektrondy tarazyny, bólip-oraýǵa kerek materıaldy, telefon men noýtbýkty tárkiledi.
«Qazir spaısty satý boıynsha sotqa deıingi tergeý bastaldy. Kúdikti Petropavl qalalyq polıtsııa basqarmasynyń ýaqytsha ustaý ızolıatoryna qamaýǵa alyndy. Buǵan deıin esirtkini saqtaǵany úshin jazasyn ótep, ótken jyldyń kókteminde bosaǵan edi», - deıdi esirtki qylmysyna qarsy is-qımyl bóliminiń bastyǵy Rahat Nurahmetov.
Polıtseıler byltyr kúzde Aqqaıyń aýdanynda esirtki zerthanasyn anyqtaǵan edi. Jalpy jyl basynan oblystyń tártip saqshylary esirtki bıznesine qatysty 37 qylmysty anyqtady. Nátıjesinde 1400 gramm túrli esirtki zaty aınalymnan alyndy.