Petropavlda áleýmettik nysandar jylytý maýsymyna daıyn ba
PETROPAVL. QazAqparat – Soltústik Qazaqstan oblysynda shamamen bir aıdan keıin jylytý maýsymy bastalady. Áleýmettik nysandar qyrkúıek aıyna deıin daıyndyq qujatyn alýy tıis, dep habarlaıdy QazAqparat tilshisi.
SQO energetıka jáne turǵyn úı-kommýnaldyq sharýashylyǵy basqarmasynyń málimetinshe, Petropavlda ortalyqtandyrylǵan jylytý júıesine 185 nysan qosylǵan, onyń 106-sy bilim berý uıymy. Búginde 81-i daıyndyq qujatyn aldy.
«Oblys ortalyǵyndaǵy 4 mektep elektr qýatymen jylytylsa, Jumysshy kentindegi №44 mekteptiń óz qazandyǵy bar. Nysanǵa 20 tonna kómir jetkizildi.
33 densaýlyq saqtaý nysany bolsa, sonyń 30-y jylytý júıesin jýyp, shaıdy. Sol sııaqty mádenıet salasyna qaraıtyn 29 nysannyń 23-i, 15 sport nysanynyń 12-si tıisti jumysty atqardy», - deıdi SQO energetıka jáne turǵyn úı-kommýnaldyq sharýashylyǵy basqarmasy basshysynyń mindetin atqarýshy Vladıslav Lýkın.
Áleýmettik nysandar 1 qyrkúıekke deıin jylytý maýsymyna daıyndyqtan ótip, tıisti qujatty alýlary tıis.
«Petropavldaǵy kópqabatty úılerdiń daıyndyǵy da nazarda. Oblys ortalyǵynda 1164 kóppáterli baspana bar, sonyń 1135-i – ortalyq jylý júıesine qosylǵan. Qazirgi ýaqytta 642 úı nemese 57% jylýǵa qosylýǵa tehnıkalyq jaǵynan daıyn, 80-i daıyndyq qujatyn aldy», - deıdi Vladıslav Lýkın.
