Petropavlda áleýmettik mańyzdy azyq-túlikterdiń baǵasy turaqty
PETROPAVL. QazAqparat - Petropavlda áleýmettik mańyzy bar azyq-túlik taýarlarynyń baǵasy turaqty. Suıyq maı, kartop pen qanttyń baǵasy shamamen 1-2% arzandady, dep habarlaıdy QazAqparat tilshisi.
Petropavl qalalyq qoǵamdyq keńesiniń kezekti otyrysynda azyq-túlik baǵasyna qatysty máseleler talqyǵa tústi.
Statıstıkalyq málimetterge súıensek, áleýmettik mańyzy bar 19 azyq-túliktiń jeteýinde baǵa 2018 jyldyń jeltoqsan aıynan ózgermegen. Olar: 1-surypty unnan pisirilgen nan, 1-surypty jumyrtqa, maılylyǵy 72,5 % sary maı, sábiz jáne tuz. Al kartop - 2,9%, qant - 0,9%, suıyq maı - 1% jáne makaron ónimi 1,9% arzandaǵan. Un, kúrish, aıran, irimshik, taýyq eti, sarymsaq pen qyryqqabattyń baǵalary kerisinshe 5-56 teńgege deıin qymbattady.
«19 taýardyń ishindegi 17-sinde baǵalar respýblıka boıynsha ortasha baǵadan aspaıdy. Qańtar-naýryz aralyǵynda Petropavldaǵy 29 qaıta óńdeý kásiporny 14,6 mlrd teńgeniń ónimin shyǵardy. Baǵany turaqty ustaý úshin bul kásiporyndar ónim kólemin ulǵaıtýy tıis. Budan basqa Petropavl qalalyq ákimdigi men negizgi saýda kásiporyndarymen áleýmettik mańyzy bar azyq-túlik baǵasyn turaqty ustaý jóninde memorandýmǵa qol qoıdyq», - deıdi Petropavl qalalyq kásipkerlik jáne aýyl sharýashylyǵy bóliminiń basshysy Evgenııa Salnıkova.
Qazir Petropavl qalasynda ár apta saıyn 8 saýda ortalyǵynda baǵa monıtorıngi júrgiziledi. Oblystyń turaqtandyrý qorynda 38 tonna sábiz, 485 tonna kartop, 2,5 tonna tarazylyq jarma, 6 myń ólshep-býylǵan orama jarma, 13 tonna qant jáne 7 myń lıtr suıyq maı saqtalǵan.
Mamandardyń aıtýynsha, ár aptanyń demalys kúnderi Petropavldaǵy tórt iri saýda ornynda aýylsharýashylyǵy jármeńkeleri uıymdastyrylyp keledi. Jyl basynan 44-i ótip, 57,4 mln teńgeniń azyq-túligi saýdalandy.
