Petropavlda áleýmettik qyzmetker tyl ardagerine páterin qaıtaryp berdi
PETROPAVL. QazAqparat – Petropavlda baspanasyz qalǵan 83 jastaǵy Lıýdmıla Nosıkke áleýmettik qyzmetker páterin qaıtaryp berdi, dep habarlaıdy QazAqparat tilshisi.
Esterińizge salaıyq, Petropavldyń 83 jastaǵy turǵyny, tyl ardageri Lıýdmıla Nosıktiń páterinen aıyrylyp , dalada qalǵanyn aıtqan edik. Zeınetkerdiń nemeresi Natalıa Sereda ájesiniń 2 bólmeli pátersiz qalǵanyn estip, shý shyǵarǵan edi. Aıtýynsha, baspanany ardagerge 4 aı boıy qyzmet kórsetken áleýmettik qyzmetker syı qujat arqyly óz atyna aýdaryp alǵan.
19 mamyr kúni olarǵa áleýmettik qyzmetkerdiń advokaty habarlasqan. Ol notarıýsqa birge baryp, buǵan deıin syı qujatpen berilgen páterdi ájeıdiń atyna qaıta túsiretindikterin aıtqan.
«Erteńine ájem ekeýimiz notarıýsqa baryp, páterdi qaıta atyna túsirdik. Kezdesýge áleýmettik qyzmetker de keldi. Іsine ókingeni baıqalmaıdy, ájemnen keshirim de suramady», - deıdi Natalıa Sereda.
Natalıa sol kúni baryp, páter esiginiń qulpyn aýystyrǵan. Alaıda ol baspanaǵa ájesin aparmaıtyn bolyp sheshti.
«Páterdiń astan-kesteńi shyǵyp jatyr. Jıhaz eski bolǵandyqtan tıispepti. Qundy zat izdegendeı. Sol sebepti ájemdi onda aparýǵa batpaı otyrmyn. Úıiniń qazirgi jaǵdaıyn kórse jylap, qan qysymy kóteriledi. Men bul isti sońyna deıin jetkizbekpin. ıAǵnı áleýmetik qyzmetker jazalanýy tıis», - deıdi Natalıa Sereda.
Nemeresi tergeý aıaqtalysymen ájesin óziniń qazirgi turǵylyqty jeri – Máskeýge alyp ketpek.
