Petropavlda aldaǵy jylý berý kezeńine daıyndyq qalaı júrip jatyr
ASTANA. QazAqparat – Búgin Soltústik Qazaqstan oblysynyń turǵyndarymen kezdesý kezinde Energetıka mınıstri Almasadam Sátqalıev aldaǵy kúzdegi jylý berý kezeńine daıyndyq jaıynda túsinik berdi, dep habarlaıdy QazAqparat tilshisi.
«Jol kartasy 5 blokqa bólingen, ol aldaǵy jylý berý maýsymyna JEO-ny ýaqtyly ári sapaly daıyndaýdy qamtamasyz etedi. Birinshi blok aıasynda №1 tútin qubyryn bólshekteý, №2 tútin qubyryn kúrdeli jóndeý jáne №2 men №3 tútin qubyryn tekserý boıynsha is-sharalar aıaqtaldy. Al ekinshi blok boıynsha qamtylǵan jumystarda 4, 5 qazandyqtardy №2 tútin qubyryna jáne №8 qazandyqty №3 tútin qubyryna qosý úshin bas korpýsty qalpyna keltirý, sondaı-aq ýaqytsha gaz qubyrlaryn salý jónindegi jumystar aıaqtaldy», - dedi A. Sátqalıev.
Onyń aıtýynsha, jol kartasyndaǵy úshinshi blok aıasynda qazandyqtar men jalpy stantsııalyq, qosalqy jabdyqtar jóndeldi. Sondaǵy №9 jáne 11 qazandyqty jóndeý bıylǵy 30 maýsymǵa deıin aıaqtalady.
Tórtinshi blok boıynsha eki týrboagregatty kúrdeli jóndeý aıaqtaldy.
«Besinshi blok aıasynda 2024 jylǵy 30 qyrkúıekke deıin №1 tútin qubyryn salý josparlanǵan. Jańa qubyrǵaarnalǵan irgetasty bekitý jumystary aıaqtalýǵa jaqyndady. Osydan keıin murjanyń temirbeton qurylysy salýdyń ekinshi kezeńi bastalady. Sonymen qatar, ınvestıtsııalyq kelisimge sáıkes №2 qazandyqty rekonstrýktsııalaý josparlanǵan», - dedi mınıstr.
Budan buryn habarlanǵandaı, Petropavldaǵy JEO-ny jóndeýge 5 mlrd teńgeden astam ınvestıtsııa salynbaq.
Esterińizge sala keteıik, byltyr 20 naýryz kúni Petropavldaǵy JEO-da úsh tútin murjasynyń biri opyrylyp qulady.
Petropavldaǵy JEO-daǵy jaǵdaıǵa qatysty «OAEK» AQ Dırektorlar keńesiniń tóraǵasy da túsinikteme berdi.
