Petropavlda aldaǵy kúnderi qatty gýil estilýi múmkin – energetıkter eskertti

PETROPAVL. QazAqparat – Petropavl turǵyndary demalys kúnderi qatty gýil estýi múmkin. Alaıda dúrligip qorqýdyń qajeti joq. Oblys ortalyǵyndaǵy №2 jylý-elektr ortalyǵy josparly jumys júrgizbek, dep habarlaıdy QazAqparat tilshisi.

«SevKazEnergo» AQ baspasóz qyzmetiniń málimetinshe, Petropavl turǵyndary ushaqtyń gýiline uqsas qatty dybysty 5-6 qarasha aralyǵynda saǵat 17.00 men 6.00 aralyǵynda estýi múmkin. Alaıda buǵan úreılenip qorqýdyń qajeti joq.

Bul kúnderi Petropavldaǵy 2-jylý-elektr ortalyǵynda josparlanǵan jumys júrgiziledi, ıaǵnı jóndeýden ótken № 7 qazandyq agregatynda býqyzdyrǵysh qubyrlar úrlenedi.

Mundaıda ádette ónerkásiptik bý qatty dybys shyǵarady, óıtkeni ol arnaıy qondyrǵy arqyly qatty qysymmen atmosferaǵa jiberiledi.

Bul jumys mamandardyń tolyq baqylaýynda júzege asyrylmaq.

Osyǵan uqsas jumys buǵan deıin Petropavlda 25 qyrkúıekte jáne 16-17 qazan kúnderi júrgizilgen edi.

Biraq ol joly energetıkter bul jumys týraly aldyn ala eskertpeı, túngi gýil turǵyndardyń qorqynyshyn týǵyzdy.

Qatty shýdan shoshyǵan turǵyndar oılaryn san-saqqa júgirtip, áleýmettik jelide qyzý talqyǵa saldy.

Túngi gýildi jylý-elektr ortalyǵyndaǵy kezekti apat dep qabyldaǵandar da boldy.